Temirtaýǵa jaýǵan qara qar: «Qazgıdromet» kásiporyndy eskertip otyratyn boldy

ASTANA. QazAqparat - «Qazgıdromet» RMK Temirtaýdaǵy «ArselorMıttal Temirtaý» kásipornyna jaısyz meteojaǵdaı týraly aldyn ala málimet berip otyratyn boldy. Bul týraly Úkimet úıinde ótken baspasóz máslıhatynda QR Energetıka vıtse-mınıstri Ǵanı Sádibekov málim etti, dep habarlaıdy «QazAqparat» HAA tilshisi. 

«Temirtaýda jaýǵan qara tústi qar týraly osyǵan deıin de birshama aqparat berilgen. Búgingi tańda Óskemen men Almaty, tipti Astana sekildi qalalarda atmosferalyq aýanyń lastaný jaǵdaılary tirkeldi. Eń birinshi kezekte, biz Temirtaýdaǵy ahýaldy zerttedik. Táýelsiz saraptama jumystaryn júrgizgen ekologtar men qoǵam belsendilerine kóp rahmet. Olardyń kelgen sheshimine sáıkes, Temirtaýda qorshaǵan ortaǵa syrtqy faktorlar áser etpegen. Demek, qaldyqtardyń barlyǵy da, shań men metall - ol atalǵan óńirdegi óndiristik kásiporyndardyń, jeke sektordyń, avtokólikterdiń qaldyqtary. Negizgi faktor - jaısyz meteojaǵdaı», - dedi vıtse-mınıstr.

Onyń aıtýynsha, Temirtaýda qańtardyń 1-14 aralyǵynda jel soqpaı, aýa qozǵalmaı, tómen temperatýra saqtalǵan. Osynyń saldary atmosfera aýasynyń lastanýyna ákep soqtyrǵan.

«Biz «Arselor Mıttal» kásipornyna «Qazgıdromet» RMK boljamdy meteojaǵdaılar týraly aldyn ala málimet berip otyratyndaı kelisimge keldik. Osylaısha, atalǵan kásiporyn jaısyz kúnderi qaldyqtardy syrtqa shyǵarýdy qysqartatyn bolady. Mundaı jaǵdaı endi qaıtalanbas degen senimdemiz», - deıdi ol.

Ǵanı Sádibekovtyń aıtýynsha, Óskemen sekildi óndirisi qaınap turǵan qalada da atmosferanyń lastaný jaǵdaıy tirkelgen.
«Jaısyz meteojaǵdaı rejimin qoldaný Temirtaýdaǵy jaǵdaılardyń aldyn alary sózsiz», - deıdi vıtse-mınıstr.