Temirtaýdan shyǵarylatyn qaldyqtyń 87 paıyzy «ArselorMıttal»-ǵa tıesili – Ekologııa mınıstrligi

NUR-SULTAN. QazAqparat –Temirtaý qalasynan shyǵarylatyn qaldyqtyń 87 paıyzy «ArselorMıttal Temirtaý» AQ metallýrgııalyq kombınatyna tıesili. Bul týraly QR Ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Zulfuhar Joldasov málim etti, dep habarlaıdy QazAqparat tilshisi.

«Temirtaý qalasynan ótken jyly shyǵarylǵan qaldyqtardyń kólemi 212 myń tonnany qurady. Qala atmosferasyn negizgi lastaýshy «ArselorMıttal Temirtaý» AQ metallýrgııalyq kombınaty. Onyń úlesine qala boıynsha zııandy qaldyqtyń 87% - y jáne oblys boıynsha 40% -y tıesili. Qaraǵandy oblysyna arnalǵan ekologııalyq jol kartasyna sáıkes Temirtaýdaǵy jaǵdaıdy ońaltýǵa 28 is-shara qarastyrylǵan. Onyń ishinde 22 tarmaq boıynsha oryndaýdy «ArselorMıttal Temirtaý» AQ óz mindetine alady», - dedi Z. Joldasov OKQ-de ótken baspasóz máslıhatynda.

Odan bólek, komıtet basshysynyń sózine sensek, atalǵan kompanııa ekijaqty memorandým aıasynda atmosferany lastaýdy 30% - ǵa azaıtýǵa mindetti jáne qala mańyna 500 myń aǵash otyrǵyzý kerek.

Buǵan deıin habarlaǵanymyzdaı, Nur-Sultan qalasynan ótken jyly 113 myń tonna túrli deńgeıdegi qaldyq shyǵarylǵan.

Foto: saigez.kz