Temirtaýdaǵy Tuńǵysh Prezıdent Tarıhı-mádenı ortalyǵy jańa jádigerlermen tolyqty
Tuńǵysh Prezıdenttiń Tarıhı-mádenı ortalyǵynda «Elin súıgen, eli súıgen Elbasy!» atty saltanatty shara ótti.
Ortalyq ǵımaraty kúrdeli jóndeýden ótip, jańartyldy. Ekspozıtsııa Astanadan jiberilgen jádigerlermen tolyqty.
"Bul mereke - Prezıdentimizge onyń danaly basshylyǵy, bizdiń qazirgi jarqyn kúnderimiz ben bolashaqqa degen senimimiz úshin kórsetilip otyrǵan qurmet pen alǵystyń beligisi. Elbasynyń is-áreketteri men barlyq bastamalary qazaqstandyqtardyń ómirin jaqsartýǵa baǵyttalǵan. Biz barlyǵymyz Elbasynyń sheshimderi qanshalyqty danaly ekenin kórip otyrmyz. Elordamyzdy kóshirýdiń ózin alsaq ta. Kezinde bul sheshimge kúmán keltirgender qanshama boldy, alaıda ýaqyt barlyǵyn óz ornyna keltirdi. Qazir Astana - álemdik deńgeıdegi elordasy bolyp otyr", - dedi Erlan Qoshanov. «Biz Tuńǵysh Prezıdenttiń ómiri Qaraǵandy oblysymen baılanysty ekenin maqtan tutamyz. Temirtaý - onyń jastyq shaǵynyń qalasy. Munda Nursultan Ábishuly Nazarbaev jetekshi, kóshbasshy retinde qalyptasty».
Kezdesýde Elbasynyń zamandastary da ótken kúnderden qalǵan óz estelikterimen bólisti.
«Men Nursultan Nazarbaevpen birge oqydym. Ol bizdiń jastyq shaǵymyz ótken jyldar bolatyn. Sol kezdiń ózinde ol óziniń kóshbasshylyq qyrlaryn kórsetetin: tamasha sheshen, fılosof boldy, oqýda barlyǵyn ozyp otyratyn», - dep atap ótti ardager-metallýrg Ermek Tileýbaev.
Saltanatty shara barysynda Prezıdenttiń súıikti ánderi jáne Nursultan Nazarbaevtyń jazǵan týyndylary oryndalǵan merekelik kontsert uıymdastyryldy. Qonaqtar janyna jyly, burynnan tanys áýenderdi estip, qol shapalaqtap, ártisterge qosylyp án shyrqady.
Kezdesýge kelgender ortalyqtyń jańa toptamasymen tanysty. Onyń qorynda 3500-den astam jádiger bar. Jýyrda elordadan jańa zattar jetkizildi: 15 jádiger - Prezıdenttiń jeke zattary, basqa memleketterdiń basshylary jáne tanymal saıası qaıratkerler syılaǵan syılyqtar.
Olardyń arasynda anaǵurlym baǵalysy - Qazaqstan Konstıtýtsııasynyń úlken kórkem basylymy. Murajaıǵa sonymen qatar tanymal sportshy Aleksandr Vınokýrovtyń Prezıdentke syılaǵan velosıpedi berildi. Kórermender Elbasynyń jeke sporttyq jabdyqtaryn: tennıske arnalǵan formasy men raketkasyn da kóre alady.
Shara barysynda «Saryarqa tósindegi kezdesýler» kitabynyń tusaýy kesildi. Bul Tarıhı-mádenı ortalyqtyń, Oblystyq muraǵattyń jáne N.V. Gogol atyndaǵy oblystyq ámbebap kitaphanasynyń birlesip shyǵarǵan týyndysy. Kitapta Elbasynyń 1990-shy jyldan 2018-shi jylǵa deıingi aralyqta Qaraǵandy oblysyna jasaǵan saparlary týraly gazet maqalalary men muraǵat materıaldar engizildi.
Tuńǵysh Prezıdenttiń Tarıhı-mádenı ortalyǵynyń kúrdeli jóndeýine bıýdjetten 215 mln teńge bólingen. Bul qarajatqa ishki jáne syrtqy jóndeý jumystary júrgizildi.