Temirtaýdaǵy kópqabatty úıde gaz-aýa qospasy jaryldy
14:23, 26 Tamyz 2022
TEMІRTAÝ. QazAqparat – Qaraǵandy oblysynyń Temirtaý qalasyndaǵy kópqabatty úıde gaz qospasy jaryldy, dep habarlaıdy QazAqparat tilshisi.
Tótenshe jaǵdaı 25 tamyz kúni saǵat 14:35-te Metallýrgter dańǵyly, 21/2B mekenjaıynda boldy.
Tótenshe jaǵdaı departamenti mamandarynyń aıtýynsha, 9 qabatty úıde gaz-aýa qospasynyń jarylysy bolǵan. Kireberistiń 2-shi qabat deńgeıinde áınekter synǵan. Órt tutanǵan joq.
«Temirtaý qalasy boıynsha TJB qyzmetkerleri gaz qyzmetimen jáne turǵyn úı ıelerimen birlesip páter boıynsha tekserý júrgizdi, sodan keıin turǵyndar óz páterlerine oraldy», - dep habarlady Qaraǵandy oblysy TJD baspasóz qyzmeti.
Eske sala keteıik, 16 tamyz kúni dál osy kóshedegi kópqabatty úıde gaz-aýa qospasy jarylǵan bolatyn. 4 adam zardap shekti. Órt bolǵan joq, úsh páter búlindi.