Temirtaýda jalǵan vaktsınatsııa faktisi boıynsha qylmystyq is qozǵaldy

TEMІRTAÝ. QazAqparat – Temirtaýda 59 jastaǵy er adam COVID-19-dan kóz jumdy. Bir kúnnen keıin málimetter bazasynda ol koronavırýstyq ınfektsııaǵa qarsy vaktsınanyń ekinshi komponentin alǵany týraly belgi paıda boldy. Qazirgi ýaqytta tártip saqshylary qaladaǵy densaýlyq saqtaý mekemeleriniń biriniń dárigerlerin vaktsınatsııa pasportyn qoldan jasady degen kúdik boıynsha tekserip jatyr, dep habarlaıdy QazAqparat tilshisi.

Qaraǵandy oblysynyń polıtsııa departamenti QR QK 385-baby «Resmı qujattardy qoldan jasaý jáne ótkizý» boıynsha qozǵalǵan qylmystyq isti tirkep, tergeýdi bastady.

Atalǵan faktini Qaraǵandy oblysynyń Medıtsınalyq jáne farmatsevtıkalyq baqylaý komıtetiniń departamenti COVID-19-ǵa qarsy vaktsınatsııalanǵandardyń arasynda koronavırýstyq ınfektsııadan bolatyn ólim-jitimge qatysty monıtorıng júrgizý barysynda anyqtady.

«Aıta keterligi, Temirtaý qalasynyń 59 jastaǵy turǵyny juqpaly aýrýlar gospıtaline jatqyzylǵanǵa deıin vaktsınanyń birinshi komponentimen ekpe aldy degen málimet bolǵan. Bes kúnnen keıin bul azamat indetten kóz jumdy. Alaıda, ol qaıtys bolǵannan keıingi kúni bazada er adamnyń vaktsınanyń ekinshi komponentin alǵany týraly belgi paıda boldy. Bul, árıne, onyń alǵashqy vaktsınany alýyna qatysty mamandardyń kúmánin týdyrdy», - dep túsindirdi polıtsııa departamentiniń tergeý bóliminiń bastyǵy Almaz Salamatov.

Quqyq buzýshylyq rastalǵan jaǵdaıda kinálilerge 2000 AEK-ke deıingi mólsherde aıyppul tóleýge týra keledi nemese olar eki jylǵa bas bostandyǵynan aıyrylýy múmkin. Qazirgi ýaqytta atalǵan fakti boıynsha tergeý júrgizilýde. Tıisti ınstantsııalarǵa suranystar joldandy. Tergeý barysy Oblystyń PD basshylyǵynyń baqylaýyna alyndy.