Temirtaýda sport klýbynyń jabylýynan adamdar jappaı jumystan shyǵarylmaq

QARAǴANDY. QazAqparat - Aýktsıondyq  saýda-sattyqtyń sátsiz ótýine baılanysty «Temirtaý» sport klýby» memlekettik mekemesine qarasty sport saraıy, muz aıdyny, «Jastar» basseıniniń ǵımaraty men «Metallýrg» stadıony jabylatyn bolady. Saldarynan 270 qyzmetker  jumyssyz qalmaq, dep habarlady «QazAqparat» HAA tilshisi.

27 sport túri boıynsha 57 bapkerdi qosa alǵanda, barlyǵy 270 qyzmetker men qyzmet kórsetýshi personal  jumystan bosatylatyny týraly eskertý hatyn aldy,  «Temirtaý» sport klýbynyń» dırektory Nurlan Taýrabaev pen mekeme ujymy tyǵyryqtan shyǵar jol tappaı dal bolýda.

Sport klýby aýmaǵynda sport saraıy, «Jastar» basseıni, «Metallýrg» stadıony, muz aıdyny, garaj ornalasqan. Mekemelerdi taratý olardyń jumysy tolyq toqtaıtynyn bildiredi. Sport klýbyn kútip ustaýǵa memleket endi aqsha bólmeıdi.

Sport klýby «2016-2020 jyldarǵa arnalǵan jekeshelendirýdiń keshendi jospary» aıasynda saýdaǵa úsh ret shyǵarylǵan. Olarǵa suranys bolmady. Baǵalaý komıssııasy klýbtyń qunyn 1 mıllıard 192 mıllıon teńgege baǵalady. Nysannyń jalpy jaǵdaıy «jaqsy» dep baǵalanǵan: sport saraıy - qanaǵattanarlyq kúıde, júzý basseıni - jaqsy, stadıon - qanaǵattanarlyq, muz saraıy - jaqsy jáne garaj qanaǵattanarlyq jaǵdaıda.