Temirtaýda gaz-aýa qospasy jarylyp, 4 adam zardap shekti

TEMІRTAÝ. QazAqparat - Temirtaýda bes qabatty úıde gaz-aýa qospasy jarylyp, 4 adam zardap shekti, 53 adam qaýipsiz jerge kóshirildi, dep habarlaıdy QazAqparat tilshisi.

Oqıǵa ornyna Temirtaý qalasynyń ákimi Qaırat Begimov pen Qaraǵandy oblysy ákiminiń orynbasary Vadım Basın, barlyq shuǵyl qyzmetter bardy.

Oblystyq Tótenshe jaǵdaılar departamentiniń málimetinshe, 16 tamyz kúni saǵat 12:08-de Metallýrgter dańǵyly, 5/2 mekenjaıyndaǵy úıde gaz-aýa qospasy jarylyp, saldarynan qabattar arasy opyrylyp túsken. Órt shyqqan joq. Úsh páter búlingen.

Tórt adam zardap shekti. 53 adam, onyń ishinde 7 bala evakýatsııalandy.

Oqıǵa ornynda qutqarýshylar jumys istep jatyr.

Temirtaý ákimi turǵyndarmen kezdesip, ýaqytsha ornalasýǵa bolatyn oryndy tabýǵa jáne páterlerdi qalpyna keltirýge kómek kórsetiletinin aıtty.