Temirtaýda gaz-aýa qospasy jarylǵan kópqabatty úıde turýǵa ruqsat joq

TEMІRTAÝ. QazAqparat - Temirtaý qalasynda gaz-aýa qospasynyń jarylysy saldarynan qıraǵan kópqabatty úıde úsh uıym tekseris júrgizip jatyr. Komıssııa bul úıge ázirge qonystanýǵa bolmaıtyny týraly aldyn ala usynys berdi, dep habarlaıdy QazAqparat tilshisi.

Búgingi kúni úıge tehnıkalyq tekserýdi úsh uıym júrgizedi: «Astana Tehnadzor» JShS, «KazMırr» JShS, «TransInjınırıng»JShS. Tekserý nátıjeleri 20 tamyzda daıyn bolady.

Nátıjeler shyǵarylǵanǵa deıin bul úıde turýǵa bolmaıtyndyǵy týraly aldyn ala usynys jáne úıdiń plıtalary men konstrýktsııalaryn nyǵaıtý boıynsha usynys berildi.

Sondaı-aq úıdegi páterler men turǵyndar sanynyń tolyq bazasy qalyptastyryldy: 80 páter, 155 turǵyn, onyń ishinde qart adamdar – 12 adam, 18 jasqa deıingi 15 bala.

«Jedel shtab úı turǵyndaryna ýaqytsha turǵyn úı berý máselesi boıynsha táýlik boıy kómek kórsetedi (22 adamnan turatyn 8 otbasy Temirtaý polıtehnıkalyq kolledjiniń jataqhanasyna ornalastyryldy. 70 otbasy týystaryna jáne jalǵa beriletin páterlerge qonystandy), 2 otbasy páterlerde turmaıdy, 33 turǵynǵa keńes berildi (16 tamyzdaǵy jaǵdaı boıynsha – 67 keńes). WhatsApp-ta top quryldy, onda táýlik boıy konsýltatıvtik kómek kórsetiledi», - dep habarlady Temirtaý qalasynyń ákimdiginen.

Eske sala keteıik, 16 tamyzda Temirtaýda bes qabatty úıde gaz-aýa qospasy jarylyp, 4 adam zardap shekti, 53 adam qaýipsiz jerge kóshirilgen bolatyn.