Temirtaýda fýtbol oınap júrgen balanyń ústine qaqpa qulady
Oqıǵa 9 mamyrda boldy. Metallýrgter stadıonynda balalar fýtbol oınap júrgende kenetten balanyń basyna úlken qaqpa qulaǵan.
Jaraqat alǵan balany ata-anasy Temirtaý qalalyq aýrýhanasyna jetkizdi.
«2010 jyly týǵan patsıent Temirtaý qalasy ortalyq aýrýhanasynyń qabyldaý-dıagnostıka bólimshesiniń travmatologııa kabınetine tústi. Qabyldaý kezinde balanyń jaǵdaıy qanaǵattanarlyq boldy. Alǵashqy kómek kórsetilip, jaraqatyna hırýrgııalyq emdeý júrgizildi. Maqajanov atyndaǵy kópsalaly aýrýhanaǵa jiberildi. Dıagnoz - jelke aımaǵynda kógergen jara. Ambýlatorııalyq emdeledi», - dep túsindirdi Qaraǵandy oblysy densaýlyq saqtaý basqarmasynyń baspasóz qyzmeti.
Oqıǵa ornynda bolǵan kýágerler qaqpa esh bekitilmegenin aıtady.
Belgili bolǵandaı, sport korttaryn ornatýmen «SK Monolıt Stroı 1» JShS aınalysqan. Bul alań ótken jyly salynǵan.
«2022 jyly «SK Monolıt Stroı 1» JShS merdiger kompanııasy Temirtaýda 6 sport kortyn, onyń ishinde osy stadıon mańyndaǵy sport kortyn ornatty. Mamyr aıynyń basynan bastap merdiger óz nysandarynda kepildik jóndeý jumystaryna kiristi, bul týraly 3 mamyrda BAQ pen áleýmettik jelilerde habarlandy. Kepildik mindettemesiniń merzimi - 2 jyl, oǵan vandalızm faktileri kirmeıdi. Kámeletke tolmaǵan balanyń basynan ótken oqıǵa 9 mamyrda, jóndeý jumystary kezinde bolǵan. ıAǵnı, alańda adamdardyń bolýyna tyıym salynǵan kezde. Bul jaıynda merdiger turǵyndardy aldyn ala habardar etken bolatyn», - dep habarlady Temirtaý qalasy ákimdiginiń baspasóz qyzmeti.