Temirtaý turǵyny eki márte úılenip, eki áıeline de AITV ınfektsııasyn ádeıi juqtyrǵan

TEMІRTAÝ. QazAqparat – Er adamnyń qasaqana áreketi AITV juqtyrǵan áıel test tapsyrǵan kezde belgili boldy. Qazirgi tańda aýyr derti baryn bile tura saý áıelderge aýrý juqtyrǵan qaraǵandylyq qamaýǵa alynǵan, dep habarlaıdy QazAqparat tilshisi.

Belgili bolǵandaı, 2010 jyly er adam Qaraǵandy oblystyq JITS ortalyǵynda AITV juqtyrǵan adam retinde resmı túrde esepke alynǵan.

Biraq soǵan qaramastan ol eki ret úılengen jáne eki jaǵdaıda da áıelderine aýyr dertti juqtyryp úlgergen.

AITV juqtyrǵanyn onyń áıeli júktilikke baılanysty esepke turýǵa kelip, analız tapsyrǵan kezde bir-aq bilgen.

Ol tek kúıeýimen ǵana jynystyq qatynasta bolǵanyn málimdegen.

Tergeý barysynda onyń kúıeýi JITS ortalyǵynda esepte turǵany anyqtaldy. Tártip saqshylary qasaqana áreketke barǵan er adamdy qamaýǵa aldy.

Búǵan qosa JITS ortalyǵynyń qyzmetkerleri men tártip saqshylary er adamnyń birinshi jubaıyn izdep taýyp, odan test tapsyrýdy ótingen.

Taldaý nátıjesi ol kiside de AITV bar ekenin rastady.

Qazir ol sot úkimin kútip otyr.

QR QK-niń 118-baby boıynsha qylmystyq is qozǵaldy.

«Temirtaý qalalyq sotynda QK 118-shi baby 3-bóligi boıynsha qylmystyq is qaralady. Azamat S. 10 jyldan astam ýaqyt boıy adamnyń ımmýn tapshylyǵy vırýsymen aýyratynyn naqty bile tura, AITV taratqany, juqtyrǵany úshin qylmystyq jaýapkershilik baryn túsine otyryp saqtandyrý quraldaryn paıdalanbaı jynystyq qatynasqa tústi. Sonymen qatar, azamat S. AITV bar ekenin serigine habarlamaǵan. Іs jabyq sot otyrysynda qaralady. Úkim shyqqan joq», - dep habarlady Temirtaý qalalyq sotynyń baspasóz qyzmeti.