Temirtaý turǵyny 16 jasar balany garajǵa qamap asyrap kelgen

TEMІRTAÝ. QazAqparat – Temirtaý turǵyny 16 jasar balany garajdardyń birine qamap ustaǵan. Polıtsııa jasóspirimdi qamaýda asyraǵan áıeldi ustady, dep habarlaıdy QazAqparat tilshisi.

Jasóspirimniń osyndaı qatań jaǵdaıda ómir súrip jatqanyna Temirtaýdyń bir turǵyny kýá bolǵan.

Onyń aıtýynsha, 16 jasar er balanyń damýy tejelgen, eshkimmen sóılespeıdi, jaza da, oqı da almaıdy.

«Bala patronattyq tárbıede ósti. Onyń týǵan ata-anasy qaıda ekeni belgisiz. Sondaı-aq, asyrap alǵan adamdarda balany asyrap alý týraly qujattar men týý týraly kýálik te joq. Sondyqtan ol mektepke barmaǵan shyǵar. Olar balaǵa ıe bola almaǵan kezde garajǵa qamap ustady», - deıdi Temirtaý turǵyny.

Bul jaǵdaı jazdyń sońynda tártip saqshylaryna habarlanǵan.

Qazirgi ýaqytta polıtsııa jaǵdaıdyń egjeı-tegjeıin, balanyń mundaı jaǵdaıǵa qalaı tap bolǵanyn jáne balanyń ata-anasy qaıda ekenin anyqtap jatyr.

«Tamyz aıynyń basynda Temirtaý qalasynyń polıtsııa qyzmetkerleri dıspetcherlik pýnktke kelip túsken shaqyrý boıynsha garajdardyń birinen qamaýda otyrǵan jasóspirimdi taýyp aldy. Anyqtaı kele balany mundaı jaǵdaıda ustap, asyrap júrgen Temirtaý turǵyny anyqtaldy. Atalmysh fakti boıynsha QR QK 126 jáne 141-baby boıynsha qylmystyq is tirkeldi. Qajetti saraptama jasaldy. Tergeý jalǵasýda», - dep habarlady Qaraǵandy oblysy PD baspasóz qyzmeti.

Qylmystyq kodekstiń osy baptary boıynsha kúdiktiler jalpy eseptegende 5 jylǵa deıin bas bostandyǵynan aıyrylýy múmkin.