Temirtaý ekologııasyn jaqsartý jumysy qalaı júrgiziledi

TEMІRTAÝ. QazAqparat - Atmosferalyq aýanyń lastaný deńgeıi eń joǵary qalalar qataryna jatatyn Temirtaýda ekologııa máselesi taǵy da kóterildi. Qara tústi qar men qalyń tútinnen aryla almaı kele jatqan qalada jaǵdaıdy retteý úshin eń tıimdi sharalar qabyldanbaq. Mundaǵy eń iri lastaýshy - «ArselorMıttal Temirtaý» AQ kásiporny.

Kásiporynnyń qorshaǵan ortaǵa shyǵaryndylar kólemin 30% azaıtýǵa arnalǵan jańa josparyn qarastyrý úshin Qaraǵandy oblysyna QR Ekologııa, geologııa jáne tabıǵı resýrstar mınıstri Maǵzum Myrzaǵalıev jumys saparymen bardy.

Temirtaýdaǵy jıynǵa oblys ákimi Jeńis Qasymbek, kásiporyn basshylyǵy jáne ekologtar men qoǵam belsendileri qatysty.

Basqosý qorytyndysy boıynsha, tabıǵatty qorǵaý sharalarynyń oryndalý merzimin qysqartyp, shyǵaryndylar kólemin tómendetý josparyna 2025 emes, 2024 jyly qol jetkizý múmkindigin birlese qarastyrý kelisildi.

«Bul - shyǵaryndylardy azaıtý boıynsha qol qoıylǵan ekijaqty memorandýmnyń aıasyndaǵy jumystyń jalǵasy. Biz sońǵy ret osy jerde «ArselorMıttal» basshylyǵymen 20 qańtarda kezdesý ótkizgen bolatynbyz. Sol kezde kompanııa shyǵaryndylardy 30% azaıtý boıynsha jospardy ázirleýge úsh aı ýaqyt suraǵan edi. Sol sebepti búgin qalanyń ekologııalyq problemalaryn talqylaýǵa qaıta jınalyp otyrmyz»,- dedi Maǵzum Myrzaǵalıev.

Oblys ákimi Jeńis Qasymbek 2020 jyly mınıstrlikpen birge óńirdiń ekologııalyq problemalaryn sheshý boıysha Jol kartasy qabyldanǵanyn atap ótti.

«Jol kartasynda 57 shara qaralsa, onyń 25-i qorshaǵan ortaǵa shyǵaryndylardy azaıtýǵa baǵytttalǵan. Jyl saıyn Qaraǵandy oblysy boıynsha atmosferaǵa 590 myń tonna zııandy zattar shyǵarylady, onyń 40% astamy, ıaǵnı 247 myń tonnasy Temirtaý qalasyna tıesili. Munyń 86% «ArselorMıttal Temirtaý» AQ zaýytynan shyǵady (212,3 myń tonna). Zaýyt shyǵaryndylar kólemin tómendetýden bólek, Temirtaýǵa 5 jyl ishinde 500 myń aǵash egedi», - dep aıtty J.Qasymbek.

«ArselorMıttal Temirtaý» AQ bas dırektory Bıdjý Naır tek 2024-2025 jyldarǵa deıin emes, odan keıingi ýaqytta da qorshaǵan ortany qorǵaýǵa qarjy bóline beretini týraly aıtty.

«Shyǵaryndylardy azaıtýdyń jańa strategııasyna sáıkes, zaýyt balama ekologııalyq sharalardy qoldanady. Aldaǵy 5 jylda qorshaǵan ortany jaqsartýǵa kem degende 380 mln AQSh dollar ınvestıtsııa calamyz», - dedi ol.

Qoǵam ókilderi kompanııanyń jurtshylyq aldynda ashyqtyqty qamtamasyz etýine qatysty kemshilikterin atap ótti.

«Temirtaý ekologııasy – óte mańyzdy másele. Sondyqtan shyǵaryndylardy azaıtý jumysy bizdiń qatań baqylaýymyzda bolady. Sonymen birge jergilikti qoǵam belsendileri de ahýaldy nazarda ustaıdy. «ArselorMıttal» basshylyǵy endi qoǵam ókilderimen toqsan saıyn turaqty túrde kezdesip turady»,- dedi buǵan qatysty Ekologııa mınıstri.

Eske salsaq, naýryz aıynda mınıstrliktiń Ekologııalyq retteý jáne baqylaý komıteti kásiporynda jospardan tys tekserý ótkizip, ártúrli kórsetkishter boıynsha normatıvterdiń ruqsat etilgen normadan asyp ketýine baılanysty aıyppul salǵan. Sonymen birge qorshaǵan ortaǵa keltirilgen zalal 1 mlrd teńgege baǵalanǵan edi.