Temirbek Júrgenov ómiriniń sońyna deıin halqyna adal qyzmet etti – rektor

ALMATY. QazAqparat – Almatyda T.Q. Júrgenov atyndaǵy Qazaq ulttyq óner akademııasynda saıası qýǵyn-súrgin jáne asharshylyq qurbandaryn eske alý sharasy ótti. Jınalǵandar saıası qýǵyn-súrgin qurbany bolǵan, qoǵam qaıratkeri T.Júrgenovtiń eskertkishi aldynda gúl shoǵyn qoıdy, dep habarlaıdy QazAqparat tilshisi.

Sharaǵa Temirbek Qarauly Júrgenovtiń týystary, BAQ ókilderi, júrgenovtanýshy ǵalym Aıgúl Sadyqova men akademııa ujymy qatysty.

«1925 jyldyń kúzinde Qazaqstannyń basshylyǵyna F. Goloşekın kelip, «Kishi Qazan» tóńkerisin uıymdastyrdy. 1928 jyly Alash qaıratkerleri «ultshyl» degen aıyppen tutqyndala bastady. Ártúrli merzimge túrmege qamaldy, atý jazasyna kesildi, jer aýdaryldy. Mine, sondaı zııaly azamttarymyzdyń biri – Temirbek Qarauly Júrgenov. Qazaqstannyń ádebıet, mádenıet, óner salasynyń ǵana talantty ókili emes, eldiń kórnekti memleket jáne qoǵam qaıratkeri. Ómiriniń sońyna deıin qazaq eline adal qyzmet etip, halyq aldynda úlken bedelge ıe boldy. Ózi ómirden erte ótkenimen atqarǵan isi, jasaǵan qyzmeti, el bolashaǵy úshin sińirgen eńbegi búginde ádil baǵalanýda. Artynda mura bolyp qalǵan kitaptary, oqý-aǵartý, ádebı-mádenı, óner salasynda qalam tartqan qundy dúnıeleri keıingi urpaqqa qyzmet etýde»,– dedi T. Júrgenov atyndaǵy Qazaq ulttyq óner akademııasynyń rektory Aqan Ábdýalıev.

Temirbek Júrgenovtiń týysy Sábıt Imanǵalıevtyń aıtýynsha, qaıratkerdiń qoǵam men memleket retindegi tulǵasyn áli de zertteý qajet.

«Nebári 39 jasynda Keńes Odaǵynyń qandy sheńgeline ilingen bizdiń jerlesimiz, ultyn, elin, jerin sheksiz súıdi. Óziniń sanaly ǵumyryn halyqtyń jolyna arnaǵan azamatty eske alý bizdiń paryzymyz. Qaıratkerdiń qoǵam men memleket retindegi tulǵasyn jan-jaqty, túbegeıli zertteý qajet. Bul jumystar qazirdiń ózinde qolǵa alyndy. Ol týraly úsh kandıdattyq dıssertatsııa, 3 derekti fılm túsirilip, bir pesa kórermenge jol tartty. Osynyń bári T.Q. Júrgenovtiń ómirine arnalǵan tyń dúnıeler»,– deıdi ol.

Óner akademııasyna júrgenovtaný sabaǵyn ótedi. Maqsat – el mádenıeti men ádebıetine, ónerine úlken úles qosqan abzal azamattyń eńbekterin jas býynǵa sińirý, úıretý.

«Jyl saıyn stýdent, magıstrant-doktoranttar arasynda ǵylymı zertteý jumystary daıyndalady. Baıqaýlar uıymdastyrlady. T.Q. Júrgenov murasyn zertteý jalǵasyp keledi. 80-ge jýyq ádebı, mádenı, oqý-aǵartý salasyna arnalǵan maqalalar, birneshe kitaptary jaryq kórdi. Birte-birte júrgenovtanýdyń aıasy keńeıý ústinde. Bizdiń akademııada oqıtyn stýdentterge T.Q. Júrgenov atyndaǵy shákirtaqy taǵaıyndalsa degen armanymyz bar. Onyń ózi óner salasyna kelgen jastardyń ynta-yqylasyn, zertteýmen aınalysyp júrgen jas ǵalymdardyń ǵylymmen tereń aınalysýyna jol ashar edi»,– deıdi júrgenovtanýshy Aıgúl Sadyqova.

Aıta keteıik, ónerdiń san-salasyn qamtıtyn bilim ordasy 1993 jyldan beri qaıratkerdiń esimimen atalyp keledi.