Temir jol arqyly Astana men Aqtóbe arasynda jolda júrý 11 saǵatqa qysqardy

ASTANA. 13 qarasha. QazAqparat -  12 qarashadan bastap «Aqtóbe-Astana» qatynasyndaǵy №88/87 «Aqtóbe»  jańa júrdek poıyzyna bıletter satylý bastaldy. «Jolaýshylar tasymaly» AQ baspasóz qyzmetiniń málimetinshe, jolaýshylar poıyzdaryndaǵy servısti jaqsartý jáne jańa júrdek marshrýttardy ashý boıynsha jumystary jalǵasýda.

14 jeltoqsan kúni Aqtóbe stantsııasynan «Jolaýshylar tasymaly» AQ qurastyrǵan «Astana-Aqtóbe» qatynasyndaǵy №88/87 «Aqtóbe» jańa júrdek jolaýshylar poıyzy jóneltiledi. Qatynaý merzimdiligi - kún ara jup kúnderi.

Jolda júrý ýaqyty 11 saǵatqa qysqartylyp, Aqtóbeden Astanaǵa deıin 16 saǵat 56 mınýtty  jáne qaıtarda 16 saǵat  25 mınýtty quraıtyn bolady.

Aqtóbeden Astanaǵa deıingi araqashyqtyq - 1411 shaqyrym. Atalǵan poıyzdyń vagondary Astana qalasyndaǵy «Tulpar-Talgo» birlesken qazaqstan-ıspandyq kásiporynnyń zaýytynda qurastyrylǵan.

Poıyz quramy 2 tehnıkalyq vagondy, 1 vagon-meıramhana, 1 vagon-kafeterıı, «Týrıst» klasty 15 vagondy qamtıtyn 19 «Tulpar-Talgo» vagonynan turady.

Vagondar «Jolaýshylar tasymaly» AQ jyljymaly quramynyń tehnıkalyq-resýrsyn jańartý jáne arttyrý baǵdarlamasyn júzege asyrý sheńberinde satyp alynǵan jáne soǵan sáıkes 2014 jylǵa deıin taǵy 420 jolaýshylar vagony satyp alynatyn bolady.

Esterińizge sala ketsek, búgingi tańda júrdek tasymaldaý «Talgo» vagondarynan qurastyrylǵan jolaýshylar poezdarynyń úsh marshrýty boıynsha júzege asyrylýda, olar:  2003 jyldan beri qatynaıtyn «Almaty-Astana» qatynasyndaǵy №1/2 «Tulpar», «Almaty-Shymkent» qatynasyndaǵy №25/26 «Aq suńqar» jáne 2012 jylǵy shildeden bastap qatynaıtyn «Almaty-2- Petropavl» qatynasyndaǵy №151/152 «Jetisý» poıyzy.

2013 jyly taǵy 2 júrdek marshrýtty uıymdastyrý josparlanyp otyr, olar: «Astana-Atyraý», «Almaty-Atyraý» marshrýttary.