«Temir bank» AQ 2011 jyly 20 jyldaǵy rekordtyq tabys kórsetkishine qol jetkizdi

ALMATY. 17 sáýir. QazAqparat -  Temir bank aǵymdaǵy jyly tabysyn 5,4-ten 6 mıllıard teńgege deıin ulǵaıtpaq. Ony Basqarma tóraǵasy Erjan Shaıkenov búgin Almatyda ótken baspasóz máslıhatynda málimdedi.

«Temir bank úshin 2011 jyl óte jemisti boldy. Ulttyq bank standarttaryna sáıkes tabysymyz  5,4 mıllıard teńgeni qurady. Bul 20 jyldaǵy eń úlken jetistigimiz. Menshikti kapıtal 57 mıllıard teńgeni qurady. Ol 2010 jylǵa qaraǵanda 2,5 paıyzǵa joǵary», - deıdi E. Shaıkenov. Onyń aıtýynsha, Temirbank kapıtaly QR Ulttyq banki men Bazel komıteti usynǵan normatıvterdi basyp ozdy. Máselen Ulttyq bank talaptaryna sáıkes eń tómengi kórsetkish 10 paıyz bolsa, Temir bankte 17 paıyzdan astam. Bazel komıtetiniń talaptaryna sáıkes eń tómengi kórsetkish 8 paıyz bolsa, Temir bankte 47 paıyzdy quraıdy.

«Endi ótken jylǵy kórsetkishten tómen túskimiz kelmeıdi. Aldymyzǵa ambıtsııalyq mindet qoıyp otyrmyz. Bıyl qazaqstandyq standart boıynsha keminde 6 mıllıard teńge tabys tabýdy josparladyq. Qaryz qorjynynda  agressıvti emes biryńǵaı saıasat ustanamyz. 2006-2007 jyldary kepil bolsa boldy nesıe bere beretinbiz. Qazir oǵan az nazar aýdaramyz. Banktiń klıentteriniń ishinde zańdy tulǵalar negizinen shaǵyn jáne orta bıznes ókilderi », - deıdi Erjan Shaıkenov.