Temeki tuqylyn laqtyrǵan Qarasaı ákimdiginiń «dókeı» qyzmetkeriniń isi tekserilýde

NUR-SULTAN. QazAqparat – QR Memlekettik qyzmet isteri agenttiginiń tóraǵasy Anar Jaıylǵanova temeki tuqylyn laqtyrǵan Qarasaı ákimdigi qyzmetkeriniń isin jaýapty departament tekserip jatqanyn málim etti, dep habarlaıdy QazAqparat tilshisi.

Eske sala ketsek, buǵan deıin Almaty oblysy Qarasaı aýdany ákimdiginiń mamany jeli qoldanýshylardyń narazylyǵyn týǵyzǵany týraly aqparat taraǵan edi. Jelige taraǵan vıdeodan turǵyndardyń er azamatqa shaǵymyn aıtyp, narazylyq bildirip jatqanyn kórýge bolady. Sol sátte temegi shegip turǵan ol temeki tuqylyn jerge laqtyra salady. Turǵynnyń biri onyń áreketine ashýlanyp, «balalar alańyna temeki tuqylyn laqtyryp, etıkany saqtamadyń» dep shúıligedi.

Beıádep qylyq kórsetken adam Qarasaı aýdany ákimdiginiń turǵyn úı kommýnaldyq sharýashylyǵy bóliminiń mamany bolyp shyqqan.

Memlekettik qyzmetshiniń bul qylyǵyna baılanysty vıdeodan Anar Jaıylǵanova habardar ekenin málim etti.

«Iá, biz bul oqıǵadan habardarmyz. Bizde memlekettik qyzmet salasyn baqylaý jónindegi departament bar. Bul departament atalmysh máselemen aınalysyp jatyr. Ol aqparat búgin shyqty. Biz de ol máselemen jumys júrgizemiz», - dedi Anar Jaıylǵanova.