Temeki tuqylyn aýlaǵa tastaǵan sheneýnikke 14 myń teńgege jýyq aıyppul salyndy
19:56, 17 Qyrkúıek 2020
TALDYQORǴAN. QazAqparat - Almaty oblysy Qarasaı aýdany ákimdiginiń mamanyna polıtsııa aıyppul saldy, dep habarlaıdy QazAqparat tilshisi.
«Qarasaı aýdany polıtsııasynyń ýchaskelik ınspektory N. esimdi azamatqa 5 aılyq eseptik kórsetkish kóleminde aıyppul saldy» delingen Almaty oblystyq polıtsııa departamenti baspasóz qyzmetiniń habarlamasynda.
Vedomstvonyń aqparatyna sáıkes, Qarasaı aýdany ákiminiń memlekettik qyzmetkeri qoǵamdyq oryndy lastaǵany úshin Ákimshilik quqyq buzý kodeksiniń 434-babyna sáıkes jaýapkershilikke tartylǵan.
Esterińizge sala keteıik , buǵan deıin Qarasaı aýdany ákiminiń baspasóz qyzmeti turǵyn-úı kommýnaldyq sharýashylyq bóliminiń mamanyna qatysty qyzmettik tekseris bastalǵanyn habarlaǵan bolatynbyz.
Al daýdyń basy temeki tuqylynan bastalǵan. Turǵyndardyń sózinshe, sheneýnik ony «balalar oınaıtyn alańǵa» tastaǵan.