Temeki satýdyń jańa sharttary qazan aıynan bastap kúshine enedi
QR Qarjy mınıstrligi Memlekettik kirister komıteti baspasóz qyzmetiniń málimetine qaraǵanda, bul sharalar naryqtyń ashyqtyǵy men turǵyndardy jasandy ónimderden, ásirese, densaýlyqqa zııan kontrafaktiden saqtaýǵa arnalyp otyr.
Sandyq tańbalaýdy engizýdiń birinshi kezeńiniń aıasynda, 2020 jyldyń 1 qazanynan bastap temeki ónimderin satý jańa sharttarda júzege asyrylady, oǵan sáıkes temeki ónimderi mindetti túrde tańbalanýy tıis. Temeki óniminiń kez kelgen aınalymynda shyǵarylǵan merzimnen bastap 2D-SKANER qoldanylýy tıis, atalmysh skaner qajetti málimetterdi oqýǵa jáne olardy fıskaldy derekter operatorlaryna berýge múmkindik beredi. Sonymen birge, eger óndirýshi óz jumysynda 2D-SKANER qoldanatyn bolsa, onyń jańasyn satyp alýdyń qajeti joq.
Tańbalaý – taýardaǵy arnaıy shıfrlanǵan belgi, ol óndirýshi týraly tolyq aqparat, serııalyq nómir jáne buzýdan saqtaıtyn kodtan turady. Taýarlardy tańbalaýda DataMatrix biregeı kody paıdalanylady. Ol biregeı, qaıtalanbaıdy jáne ony buzý múmkin emes. Bul shynaıy óndirýshiniń taýar sapasyna kepildigin qamtamasyz etedi. DataMatrix temeki qorabynyń syrtyna ornalastyrylady jáne bul kodtyń 30 paıyzǵa deıin buzylýy anyqtalsa da, 2D-SKANER osyndaı kodty oqı alady.
«Kásipkerlerge yńǵaıly bolýy úshin Sandyq tańbalaýdy engizý men taýarlardy qadaǵalaý jónindegi ulttyq operator naryqta satylatyn skanerlerdi testileýden ótkizip, sandyq tańbamen qoldaný talaptaryna saı keletin qurylǵylardy tańdap aldy», - delingen habarlamada.