Temeki buıymdaryna aktsız markalarynyń ornyna shtrıh kodtar qoldanylady

NUR-SULTAN. QazAqparat - Qazaqstanda temeki buıymdaryn tańbalaýda aktsız markalarynyń ornyna shtrıh kodtar qoldanylady. Shtrıh kodtardy temeki buıymdarynyń óndirýshileri men ımporterlary japsyrýy qajet. Bul týraly QR Qarjy mınıstrligi Memlekettik kirister komıtetinen málim etti, dep habarlaıdy QazAqparat tilshisi.

Vedomstvo aqparatyna sáıkes, Salyq kodeksiniń 142-babynyń 17-tarmaqshasynda «aktsızdik markalar» termıni «sáıkestendirý qurylǵylaryna» aýystyryldy. Atalǵan norma 2022 jyldyń 1 qańtarynan bastap qoldanysqa endi. Sáıkestendirý qurylǵylary – bul shtrıh kod túrinde usynylǵan nemese radıojıilik belgisine jazylǵan nemese avtomatty túrde sáıkestendirýdiń ózge quraly (tehnologııasy) paıdalanyla otyryp usynylǵan, mashınamen oqylatyn nysandaǵy sımvoldardyń biregeı tizbegi.

«Óz kezeginde, temeki ónimderin tańbalaý óndirilgen sátten bastap, ımport qosa alǵanda, qadaǵalaý múmkindigin beredi. Osyndaı tańbalaýdyń arqasynda tutynýshylarǵa satyp alynatyn taýarlar týraly tolyq aqparat alýǵa múmkindik berildi.

Osylaısha, aktsız markalary alynyp tastalýyna baılanysty, 2022 jyldyń 1 qańtarynan bastap temeki ónimderi tek qana sáıkestendirý qurylǵylarymen tańbalanady. Alkogol ónimderine qatysty, olarǵa osyǵan deıin qoldanylǵandaı eseptik-baqylaý markalary japsyryla beredi», - dep atap ótedi komıtetten.