Telearnalarda aqparatty aýdıtorııaǵa jetkizý ádisteri ózgerip jatyr - Lázzat Tanysbaı

ASTANA. QazAqparat – Telearnalarda aqparatty aýdıtorııaǵa jetkizý ádisteri ózgerip jatyr. Bul týraly elordadaǵy birinshi Ortalyq Azııa medıaforýmynda «Qazaqstan» RTRK» AQ Basqarma tóraǵasy Lázzat Tanysbaı aıtty, dep habarlaıdy QazAqparat tilshisi.

«Jas urpaq arasynda televızııa endi qoǵamdy qyzyqtyrmaıdy degen qate pikir aıtylyp júr. Shyn máninde, bul sala joıylyp ketpeıdi, tek aýdıtorııamyzǵa jetkizý ádisteri ǵana ózgeredi. Atap aıtqanda, ınternette kórýge bolatyn senimdi jáne tartymdy kontenttiń barlyǵyn telearna qyzmetkerleri daıyndap júrgenin baıqaýǵa bolady», - dedi L. Tanysbaı.

Sonymen qatar ol búginde telearnalardyń ǵalamtordaǵy jáne áleýmettik jelilerdegi kontentine qyzyǵýshylyq óte zor ekenin aıtty.

«Sondyqtan bul taqyrypqa qatysty toqtalsaq, shyn máninde televızııa kontentine degen zor senim bar. Buǵan dálel retinde osy baǵyttaǵy kórsetkishterdi aıtýǵa bolady. Keshe ǵana bul saladaǵy zertteýlerdi qarap shyqtym. Bul zertteýdi USAID tapsyrysy boıynsha Internıýs júrgizgen.Aýdıtorııa kún saıyn áleýmettik jelilerdi qaraǵandy unatady eken, biraq halyqtyń 54% burynǵysha dástúrli BAQ-qa senedi. Osy oraıda teledıdar birinshi orynda, kásibı ınternet saıttar ekinshi orynda bolsa, al úshinshi orynda áleýmettik jeliler tur», - dedi Lázzat Tanysbaı.