Telearnalar Naýryzǵa kórermenderge qandaı syı daıyndap jatyr
«21 naýryzdan bastap úsh kún qatarynan adamzat tarıhyndaǵy jylqynyń róli men Ortalyq Azııa dalalaryndaǵy jylqynyń shyǵý tegi týraly baıandaıtyn halyqaralyq «Equus: Jylqy tarıhy» atty derekti trılogııanyń tusaýkeseri bolady. Al naýryzdyń 22-si kúni ulttyq arna Túrkııa, Qyrǵyzstan, Ózbekstan sekildi baýyrlas memlekettermen halyqaralyq telekópir arqyly baılanys ornatyp, ár eldegi merekelik atmosferamen bólisip, sol elderdegi naýryz merekesin toılaý dástúri jaıly sıýjetter men arnaıy suhbattar usynatyn bolamyz. Sonymen qatar, mereke kúnderi «Kúnnen týǵan bala...», «Amal aıshyqtary» sekildi derekti sıpattaǵy arnaıy jobalar úsh kún qatarynan efırge shyǵady. Taǵy bir erekshe aıta ketetin aqparat - bıyl biz «Naýryz-dýman» atty arnaıy joba josparlap, efırge ázirledik. Uzaqtyǵy 2,30 saǵatqa sozylatyn jańa joba Naýryz merekesine oraı kórermenderge arnaǵan úlken tartýymyz», - dedi «Qazaqstan» telearnasynyń dırektory Erkin Muhamedjanov OKQ-da ótken «Naýryz merekesine tartý» atty baspasóz máslıhatynda.
Al, «Qazsport» telearnasy meıram kúnderi tikeleı efırde fýtboldan Qazaqstan Ulttyq quramasynyń Eýropa chempıonatyna irikteý oıyndaryn, birqatar qyzyqty baǵdarlamalar, derekti fılmder men sport sańlaqtarynyń suhbattaryn kórsetetin bolady.
Arna basshysy Pavel Tsybýlınniń aıtýynsha, kórermender 21 naýryz kúni HHІH qysqy Ýnıversıada oıyndarynyń qola júldegeri Janbota Aldabergenniń suhbatyn, odan bólek birneshe derekti fılmder, atap aıtqanda aty ańyzǵa aınalǵan qazaq qaqpashysy Quralbek Ordabaev jaıynda - «Qazaqtyń №1 qaqpashasy», qazaq boksynyń damýyna úlken úles qosqan jattyqtyrýshy Myrzaǵalı Aıtjanov týraly «Bolmysy bólek bapker», 22 naýryzda talantty bylǵary qolǵap sheberi, 2005 jylǵy álem chempıony Erdos Jańabergenov jaıynda «Daraboz», halyqaralyq «Atlant» festıvaliniń jeńimpazy atanǵan «Istorııa malenkoı rýsalkı» derekti fılmderin tamashalaı alady.
Kishkentaı kórermenderge arnalǵan «balapan» telearnasy osy kóktemgi telemaýsymda kórermen nazaryna barlyǵy 22 joba usynady. Onyń ishinde 6-aýy ishki ónim, al 10-y sheteldik úzdik anımatsııalar men derekti fılmder toptamasy, 3 telehıkaıa jáne 3 You Tube-qa arnalǵan jobalar.
«Bıyl balalar arnasynda tuńǵysh ret tańǵy baǵdarlama jaryqqa shyqty. Oıyn-saýyq jáne aqparattyq baǵyttaǵy «Tańjaryq» habaryn kishkentaı kórermender senbi jáne jeksenbi kúnderi tamashalaı alady. Al «Balamen suhbat» baǵdarlamasynda balalar elimizge belgili, ómiri men eńbek joly urpaqqa úlgi bolarlyq tulǵalarmen áńgime-dúken túrinde suhbat qurady», - deıdi «Balapan» telearnasynyń dırektory Maqpal Jumabaı.
Byltyrdan beri habar tarata bastaǵan «Tamasha tv» arnasynyń dırektory Esen Eleýken de birneshe jańalyqtarymen bólisti. Onyń aıtýynsha, jańa maýsym aıasynda bıyl arna kórermenderge 14 joba tartý etpek.
«Alǵashqy 8 joba naýryz aıynda shyqsa, qalǵan 6 jobany sáýirge josparlap otyrmyz. Olardyń barlyǵy derlik jańadan shyǵyp jatqan baǵdarlamalar, árıne ázilge qatysty. Sondaı-aq, oıyn-saýyqtyq baǵdarlamalar da bar. Eń basty úlken jobalarymyzdyń biri «Tamasha Club» ázilge qatysy bar jastardyń ártúrli obrazdaǵy qysqasha qoıylymdardan quralǵan sketch-shoý. «Bir ǵanıbet» jobasyn da erekshe atap ótkim keledi, bizdiń belgili aǵa-ápkelerimiz ózderiniń basynan ótken ázilge toly qyzyqty oqıǵalarymen bólisedi. Sondaı-aq, jalpy qazaq satırasyna, qazaq áziline, qazaq qaljyńyna qatysty ómirden ótken jandarǵa arnalǵan «Ázil-Dastan» jobasy shyǵatyn bolady. Bul jobany tanymal satırık - Kópen Ámirbek júrgizedi. Al, «Taýyp kór» tanymdyq baǵdarlamasyna qarapaıym adamdar qatysady. Olar ózderine berilgen 4-5 tapsyrma arqyly kimmen sóılesip otyrǵanyn taýyp alýǵa tyrysatyn bolady», - deıdi Esen Eleýken.