Telearna reıtıngin ýnıversıtet ǵalymdary baǵalaýy kerek – EUÝ rektory
«Qazir jýrnalıstıka tili jutańdap ketti, burmalaýshylyqqa aınalyp barady. Halyq, ásirese jastar durys sóıleý men saýatty jazýdy aqparat quraldarynan úırenedi. Qazaqtildi aýdıtorııa keńeıgen saıyn qazaqtildi jýrnalıstıka óz mindetine jaýapty qaraýy kerek. Ókinishke qaraı, emlelik, orfografııalyq, stıldik qateler kópten kezdesýde. Ár jýrnalıstiń aldynda «Orfografııalyq sózdik» jatýy qajet», - dedi E. Sydyqov onlaın-formatta «Qazaqstan Respýblıkasyndaǵy jýrnalıstıka deńgeıi» taqyrybynda ótken talqylaý barysynda.
Sonymen qatar rektor otandyq jýrnalıstıka ǵylymy máselesine toqtaldy.
«Halyq narazylyǵyn týdyrǵan, ulttyq dúnıetanymǵa jat keıbir baǵdarlamalardyń telearna reıtınginde joǵary orynǵa ıe bolyp otyrǵany neni bildiredi? Tereń mazmuny joq baǵdarlamalar kórermenderdi kóptep jınap jatady. Damyǵan elderde telearna reıtıngin ýnıversıtet ǵalymdary, salıqaly ári tájirıbeli adamdar baǵalaıdy. Osy azamattar belgilese, ár baǵdarlamanyń reıtıngi naqty bolady dep oılaımyn», - dedi Erlan Sydyqov.
Onyń paıymynsha, bul turǵyda ǵylymı taldaý, kásibı saraptama kerek.