Jaz shyǵa salysymen Alakól jaǵasyna aǵylatyn halyq qarasy kóp. Tamyz aıynda da sol. Sýy tuzdy, balshyǵy shıpaly kólge otbasymen keletinder kóp. Demalys bazalarynyń birine jaıǵasyp, oramaldaryn ıyqqa ilip, jaǵaǵa qaraı tartady.
Biraq osy demalys ornynda týrısterge qanshalyqty jaǵdaı jasalǵan? Prezıdent Qasym-Jomart Toqaev Alakóldiń demalýshylardy qarsy alýǵa daıyndyǵy tómendigin aıtqan synynan keıin munda qandaı ózgeris bar? Osyny kórý úshin kól jaǵasyna arnaıy taban tiredik.
Eń áýeli kúndiz arbatqa bardyq. Ortasynda kúnnen kólegeılep turatyn shatyry bar oryndyqtar, al eki shetinde túrli taǵam men táttilerdi usynatyn saýda oryndary ornalasqan bul arbatta adam negizinen qas qaraıǵanda kóbeıedi. Sebebi kún shyǵyp turǵanda eldiń bárin jaǵalaýdan izdeısiz.
Arbat ishi taza. Ár buryshta qoqys salǵyshtar tur.
Ájethananyń qaıda ekeni jazylǵan taqtaıshalardy baıqadyq.
Buryn ár jerde turatyn káýáphanalar azaıǵan. Onyń ornyna balmuzdaq, salqyndatylǵan tátti sýsyndar, vaflı men fast-fýd saýdasy qyzyp tur.
Týrıstik polıtsııa beketteri turǵanymen ishinde de, syrtynda da saqshylardy kórmedik.
Bálkim sodan da shyǵar, jol erejesin saqtamaıtyn júrgizýshilerdi kózimiz shaldy. Mysaly, bul kólik jaıaý júrginshiler júretin jolmen emin-erkin kele jatyr.
Jalpy arbat ishi taza bolǵanymen jerde jatqan qoqys ta joq emes.
Birneshe metr saıyn kıim aýystyratyn oryndar tur. Jalpy munda barlyǵy 25 kıim aýystyratyn oryn bar eken.
Ájethananyń qaıda ekenin baǵyt bergen taqtaıshalar arqyly taptyq. Kirý baǵasy — 100 teńge. Qolma-qol aqshańyz bolmasa mobıldi aýdarym jasaýǵa bolady.
Іshine kirip kórdik. Taza. Ájethana qaǵazy bar. Qol jýatyn suıyq sabyn da tur. Biraq ájethana sanyn taǵy arttyrý kerek sekildi.
Oblys ákimdigi bıyl jaǵalaýdaǵy sanıtarlyq toraptar sany 8-den 18-ge deıin kóbeıtiletindigin málimdegen. Áste durys. Sebebi bir ájethanaǵa birshama kezek qalyptasyp qalady. Onyń ústine ájethanalar arasyndaǵy qashyqtyq ta uzaq.
Alakólde túrli attraktsıondarǵa otyrýǵa bolady. Biraq baǵalary qymbattaý kórindi. Mysaly, aqqýǵa otyryp aınalatyn myna attraktsıonnyń baǵasy adam basyna — 2 myń teńge.
Al kól jaǵasyndaǵy jurt qarasy qalyń. Aıtpasa da túsinikti, eldiń bári sýǵa shomylyp, kúnge qyzdyrynyp jatyr.
Qaıyqqa, katamaranǵa, katerge otyrýǵa bolady.
Tipti túıemen qydyrtatyndar da júr.
Keshke qaraı arbatqa taǵy keldik. Baǵana aıtqanymyzdaı, kúndizge qaraǵanda adam qarasy kúrt kóbeıgen.
Karaokede án aıtyp, sadaq atyp, ulttyq kıim kıip fotoǵa túsýge jáne aqsha utyp alýǵa bolatyn oıyndar oınaýǵa múmkindik bar.
Sýretshige aqsha tóleseńiz sýretińizdi aınadaı qylyp salyp beredi.
Balalar úshin de qyzyqtyń túri mol.
Saýdanyń sánin keltirip jatqandar jeterlik. Oıynshyqtar, kádesyılar, túıe júninen tigilgen kıim-keshek, tabıǵı tastardan jasalǵan áshekeıler kóz tartady.
P/S: Qoryta aıtqanda, Alakólde oń ózgerister baryn baıqadyq. Dese de áli orny tolýy tıis olqylyqtar joq emes. Aıtpaqshy, kúndiz polıtseıler baıqalmaǵanymen keshke tolyp júrdi. Bir mas adamdy tórt saqshynyń áketip bara jatqanyn kórdik. Demalýshylardyń qaýipsizdigi qamtamasyz etilip, tazalyq saqtalyp, ájethanalar sany kóbeıse — Alakól jaǵasyna aǵylatyn týrıst sany arta bereri sózsiz.
Eske salsaq, osyǵan deıin jaz shyqqaly beri Alakól jaǵasynda 120-dan astam bala joǵalǵany habarlanǵan.