Tekeliniń turǵyndary jyldar boıy sapaly aýyz sýǵa jarymaı otyr

TALDYQORǴAN. QazAqparat - Jetisý oblysyndaǵy Tekeli monoqalasynyń turǵyndary jyldar boıy sapaly aýyz sýǵa qol jetkize almaı keledi, dep habarlaıdy QazAqparat tilshisi.

Kenshiler shahary tirshilik nárin Qora ózeninen alyp otyr. Al kóktem, jaz aılarynda taýdan erigen qar sýymen birge mármár tasynyń untaǵy aralasyp, sý ishýge múldem jaramaı qalady.

Sondyqtan qala turǵyndary osy ýaqytta aýyz sýdy qaınarlardan tasyp ishýge májbúr.

Tekeli sý qubyry júıesin josparly tazalaý jumysyn júrgizip, halyqty bir kún boıy aýyz sýsyz qaldyrǵan.

Biri jaıaý, biri kólikpen qala ortasyndaǵy bulaqtyń sýyn ydystaryna toltyryp alyp amaldaıdy.

«Krannyń sýy ishýge jaramaıdy, kelmeıdi. Qysta bylaı tazarǵanymen kóktem ýaqytynda sý erigennen keıin mármár aralasyp keledi de, aǵyzǵan kezde áppaq sý aǵady. Un aralasqan sııaqty kórinedi. Sondyqtan osy bulaqtan alyp ishemiz»,- deıdi Tekeli qalasynyń turǵyny Rollan Jansultanov.

Tekeli qalasynyń aýyz sý máselesin Prezıdent Qasym-Jomart Toqaev ta óńirge barǵan saparynda kótergen.

Qazirgi tańda 6 myń tekshe metrlik jańdan sý jınaıtyn rezervýar salynyp, qalaǵa 15 shaqyrym qubyr tartý jumystary júrip jatyr.

Joba quny - 1 mlrd teńgege jýyq.

Byltyr bastalǵan jumystar bıyl kúzde aıaqtalýy tıis. Qazirgi tańda jospardyń 45 paıyzy oryndalǵan.

30 myń turǵyny bar monoqalada munan bólek Shaja ózeninen qubyr tartyp, ortalyq sý júıesin kóktem jaz aılarynda taza sýmen qamtamasyz etý jumystary qolǵa alynǵan.

«Shaja ózeninen sý qubyryn tartyp jatyrmyz. Uzyndyǵy tórt shaqyrym bolady. Sonyń eki shaqyrymyn bitirdik»,- deıdi Tekeli qalalyq turǵyn úı kommýnaldyq sharýashylyq bóliminiń basshysy Ǵalym Qyzylbasov.