Tekeliniń ákimi vandaldardy ustap bergenderge smartfon syıǵa tartady

TALDYQORǴAN. QazAqparat - Almaty oblysyndaǵy Tekeli qalasynyń ákimi Baqtııar Ónerbaev qoǵamdyq oryndardy qıratyp, lastaıtyndardy  ustap bergenderge erekshe tartý jasamaq. Shahar basshysy osyndaı jaıtqa kýá bolyp, arnaıy vıdeo ne bolmasa sýretke túsirip alǵan jandarǵa Samsung uıaly telefonyn syıǵa tartpaq, dep habarlaıdy QazAqparat tilshisi. 

Qazir qala ákiminiń jańa bastamasy jaıly áleýmettik jelide jarııalanyp, kópshilik jańalyqpen bólisip jatyr. Al Baqtııar Altaıuly mundaı bastamany qolǵa alýǵa Tekelidegi sońǵy jaıttar sebep bolǵanyn aıtady. 

«Bizdiń Tekelide Uly Otan soǵysy ardagerlerine salynǵan eskertkish bar. Túngi ýaqytta sol jerge kelip ishimdik ishedi, temeki tuqylyn toltyryp, dáret te syndyryp ketedi. Bul jaǵdaı kúnnen-kúnge jıilep barady. Eger osyndaı áreket jasap júrgenderdi túsirip alsa, men ol materıaldardy sotqa jiberemin. Ákimshilik sottan sheshim shyǵarady jáne sol monýmentti sol adamdarǵa bir apta jýǵyzamyn. Al túsirgen adamǵa smartfondy halyqtyń aldynda qurmetpen tapsyramyz»,- dedi Baqtııar Ónerbaev QazAqparat tilshisine.

Aıta ketý kerek, Tekeliniń ákimi - áleýmettik jelini belsendi qoldanýshylardyń biri. Ol osydan úsh kún buryn ǵana belgisiz bireýler kóshedegi jaryq shamdaryn syndyryp ketkenin jarııalaǵan bolatyn. Al vandalızm, ne bolmasa qalany lastaıtyndarǵa kýá bolǵandar beınejazbalaryn Tekeli qalasynyń ákimdigine nemese jergilikti polıtsııaǵa tapsyrýlaryna bolady.