Tekelidegi oqýshylarǵa taratylǵan broshıýra ata-analardyń narazylyǵyn týdyrdy

TALDYQORǴAN.QazAqparat – Jetisý oblysyna qarasty Tekeli qalasyndaǵy №8 mektepte erte júktilikke qatysty oqýshylar arasynda júrgizilgen is-sharaǵa ata-analar narazylyq bildirdi, dep habarlaıdy QazAqparat tilshisi.

Ata-analar oqıǵaǵa baılanysty narazylyqtaryn áleýmettik jelide habarlaǵan. Olar kámeletke tolmaǵan balalarymen erte júktilik taqyryby ashyq talqylanǵanyna qarsy ekenderin jazǵan.

Shaǵymǵa qatysty QazAqparat tilshisi Jetisý oblystyq bilim basqarmasynyń basshysy Aıjan Adambekovaǵa habarlasyp, mán-jaıdy anyqtady.

«19 sáýirde Tekelidegi №8 mektepte kámeletke tolmaǵandardyń isi jónindegi komıssııanyń hatshysy men aýrýhana psıhology 7-9 synyp oqýshylarymen kezdesti. Qonaqtar negizinen býllıng pen kıberbýllıng taqyrybyn kóterip, oqýshylarmen áńgimelesken. Aýrýhana psıhology basqosýdy erte júktilik taqyrybymen jalǵastyrǵan. Sodan soń balalarǵa paraqsha taratqan. Biraq onda ne jazylǵanyn mektep basshylyǵyna tanystyrmaǵan», - dedi Jetisý oblystyq bilim basqarmasynyń basshysy Aıjan Adambekova.

Ata-analardyń shaǵymynan keıin Tekeli qalasynyń bilim bólimi arnaıy túsindirý jumystaryn júrgizip, osyndaı keleńsizdikke jol bergen aýrýhana psıhologyna kópshilikten keshirim suratý jóninde sheshimge kelgen.