Tekelide tóbesi opyrylyp túsken apatty úıler súrilip, turǵyndar basqa baspanaǵa kóshiriledi

TALDYQORǴAN. QazAqparat - Almaty oblysynyń Tekeli qalasyndaǵy apatty úılerdiń de máselesi kezeń-kezeńmen sheshiledi, dep habarlaıdy QazAqparat tilshisi.

Tóle bı kóshesindegi apatty dep tanylǵan birneshe úıdiń turǵyndary qaladaǵy basqa páterlerge kóshirilip, súrilgen qujyralardyń ornyna kópqabatty úıler salynady.

Bul týraly Qanat Bozymbaev osy apatty úılerdiń turǵyndarymen kezdesýinde aıtty.

«Aldymen turýǵa asa qaýipti degen úılerden bastaıyq. Sol úılerdiń turǵyndaryna qalada satylatyn páterlerden baspana alyp beriledi. Al súrilgen úılerdiń ornyna kópqabatty tıptik úlgidegi turǵyn úıler salý kerek. Shamamen eki jyldyń ishinde apatty úılerdiń máselesi tolyq sheshiledi», - dedi ol turǵyndarmen áńgime barysynda.

Esterińizge sala keteıik, byltyr mamyr aıynda Tekeli qalasyndaǵy apatty úılerdiń biriniń tóbesi ortasyna túsken bolatyn.

Sol kezde ákimdik ókilderi 2020 jyldan beri osy úılerdi súrý máselesin kóterip, bıýdjetke qarajat bólinýge suranym jiberilgenin, biraq aqsha bólinbeı jatqanyn jetkizgen bolatyn.