Tekelide salynatyn Mahabbat kópiriniń tusyna qos aqqý kelip qondy
08:38, 10 Sáýir 2020
TALDYQORǴAN. QazAqparat – Tekeli qalasyndaǵy Qaratal ózeniniń bastaýynda, Qaraoı men Chajy ózenderiniń qosylǵan jerinde eki aqqý júr, dep habarlaıdy QazAqparat tilshisi.
Qala turǵyndary biregeı tabıǵı kóriniske kýá boldy. Qala ákimi Baqtııar Ónerbaevtyń aıtýynsha, erekshe ádemi qustar juby Mahabbat kópiri salynady dep josparlanǵan orynǵa toqtaǵan.
«Bul jaı ǵana kezdeısoqtyq emes. Men muny jaqsy belgi jáne qalamyz úshin tarıhı sát dep sanaımyn. Qurmetti qala turǵyndary, aqqýlardy úrkitpeýdi ótinemin. Olar osynda qalyp, uıa salyp, gúldený men baqyttyń sımvolyna aınalýy úshin jaǵdaı jasaıyq», - dedi ol.