Tekelide oqýshylarǵa uıatty nusqaýlyq taratqan aýrýhana psıhologi jumystan ketti

TALDYQORǴAN. QazAqparat - Jetisý oblysynyń Tekeli qalasynda oqýshylarǵa uıatty nusqaýlyq taratqan aýrýhana psıhologi óz erkimen jumystan ketti. Odan ózge mektep dırektorynyń tárbıe isi jónindegi orynbasary men kámeletke tolmaǵandar isi jónindegi komıssııa hatshysy sógis aldy, dep habarlaıdy QazAqparat tilshisi.

Jetisý oblysynyń Tekeli qalasyndaǵy mektep oqýshylaryna aqyly ıntımdik qyzmet kórsetý týraly nusqaýlyqtar taratylǵan. Mundaı broshıýralardy kórgen ata-analar áleýmettik jelilerde shý kótergen.

Olardyń aıtýynsha, nusqaýlyqta jynystyq qatynas kezinde qalaı qorǵaný kerektigi jaıynda jazylǵan.

Belgili bolǵandaı quqyqtyq apta aıasynda Tekeli qalasynyń №8 mektebindegi 7-9 synyp oqýshylaryna dáris berýge qalalyq aýrýhanadan psıholog shaqyrtylǵan. Maman kámeletke tolmaǵan balalarǵa býllıng pen kıberbýllıng taqyrybynda beınerolıkter kórsetken.

Alaıda, sabaq barysynda psıholog oqýshylarǵa JITS ortalyǵy bekitken býkletterdi taratýdyń ornyna, basqa toptarǵa arnalǵan nusqaýlyqtardy berip jibergen.

Osy daýdan keıin aýrýhana psıhologi óz erkimen jumystan ketti. Odan ózge, mektep dırektorynyń tárbıe isi jónindegi orynbasary men kámeletke tolmaǵandar isi jónindegi komıssııa hatshysy sógis aldy.

Al, Jetisý oblystyq bilim basqarmasyndaǵylar Tekelidegi mektep ákimshiligin aqtap otyr.

«Bar jaıtqa kináli tárbıe saǵatyn júrgizgen aýrýhana psıhologi», - deıdi.

«Ol jerge qalalyq aýrýhananyń psıhologi kelip, mektep ákimshiligimen kelispeı, sol materıaldardy taratqan. Búgingi kúni bilim basqarmasy tarapynan tártiptik jaza qoldandyq, ıaǵnı mekteptiń tárbıe isi jónindegi orynbasaryna sógis jarııalandy. Al aýrýhana psıhologi óz erkimen jumystan bosatyldy», - dedi Jetisý oblystyq bilim basqarmasy basshysynyń orynbasary Álısher Basharov.

Aıta keteıik, buǵan deıin Tekelidegi oqýshylarǵa taratylǵan broshıýra ata-analardyń jaǵasyn ustatyp, narazylyqtaryn týdyrǵanyn habarlaǵan bolatynbyz.