Tekelide qaıyrymdy jandar 7 balasy bar múgedek otbasyǵa baspana syılady
«Fırma SMR» JShS kompanııanyń basqarýshy dırektory Janbolat Prjanov 4 bólmeli baspananyń kilti men úıdiń qujattaryn otaǵasy Sızıkov Aleksandrǵa tabystady.
«Osyndaı otbasyǵa kómek qolyn sozyp, olardyń baqytty júzderin kórý men úshin úlken qýanysh. Múmkindik barda muqtaj jandarǵa kómektesý kerek. Barsha kásipkerler men qaltaly azamattardy osyndaı ıgi ister jasaýǵa shaqyramyn», -dedi ol.
Kópten kútken baspanalaryna qol jetkizgen Sızıkov Aleksandr І toptaǵy múgedek. Ol jubaıy Melnıkova Natalıamen 7 balany asyrap otyr. Natalıa aǵymdaǵy jyldyń qańtarynan bastap kúıeýiniń jeke kómekshisi bolyp tirkelgen. Sondaı-aq, múgedektik boıynsha, kópbalaly ana retinde, ataýly áleýmettik kómek taǵaıyndalǵan. Jaldamaly úılerde turyp kelgen otbasy demeýshilerge sheksiz alǵystaryn jetkizdi. Qonys ıelerin quttyqtaı kelgen Tekeli qalasynyń ákimi Baqtııar Ónerbaev mundaı ıgi ister aldaǵy ýaqytta da jalǵasatynyn jetkizdi.
«Bul bizdiń qalada kásipkerlerdiń qoldaýymen syılanǵan úshinshi úı. Sondaı-aq, respýblıkalyq jáne oblystyq bıýdjetten kópbalaly otbasylarǵa úı satyp alý úshin arnaıy qarajat bólingen. Búginde birneshe úı satyp alynyp, qujattary rásimdelýde. Jalpy, Tekelide 415 kópbalaly otbasylar tirkelgen. Onyń 170-i úıge muqtaj bolsa, 96 otbasy kezekte tur. Jaqyn kúnderi osy kezek boıynsha úı berile bastaıdy. Bul baǵytta jumys áli de jalǵasady» -dedi B. Ónerbaev.