Tekeli qalasynda 60 páterli úı salynady

TALDYQORǴAN. QazAqparat - Jetisý oblysy, Tekeli qalasyndaǵy «Dostyq» shaǵyn aýdanynyń Seıfýllın kóshesinde 60 páterli turǵyn úıdiń qurylysy bastaldy. Tekeli qalasynyń ákimi Almas Ádil men «Shymyr» JShS bas dırektory Rýslan Valıshanov turǵyn úıdiń irgetasyn quıý rásimine qatysty, dep habarlaıdy QazAqparat.

Óz sózinde shahar basshysy Almas Ádil baspanaǵa muqtaj jandar úshin turǵyn úılerdiń kóptep salynǵany úlken qýanysh ekenin, bir-eki aı buryn ǵana «Dostyq» shaǵynaýdanynda 40 páterli jaldamaly turǵyn úı paıdalanýǵa berilgenin de aıtty. «Alataý» shaǵyn aýdanynda taǵy bir 40 páterli jaldamaly turǵyn úıdiń qurylysy júrip jatqanyn súıinshiledik. Endi, mine, 60 páterli ınvestıtsııalyq turǵyn úı salynyp bitse, qaladaǵy baspana máselesin sheshýge sep bolary sózsiz», – dedi qala ákimi.

Qurylys jumysyn qolǵa alǵan «Shymyr» JShS ýchaske basshysy Erkin Qurmanseıitovtiń sózinshe, jospar boıynsha 15 bir bólmeli, 15 eki bólmeli, 30 úsh bólmeli páter bolady. Memleket daıyn úıdi satyp alyp, ary qaraı zań aıasynda tıisti turǵyndarǵa bermek.

«Bizdiń seriktestik 60 páterli 5 qabatty úıdi tolyq salyp, ishi-syrtyn árlep, syrlap, qonystanýǵa daıyn qylǵan soń, talapqa saı sapasyn arnaıy komıssııa tekserip, qabyldaıdy. Qurylys salýǵa tıisti qujattarymyz túgel, tehnıkalyq qadaǵalaýdy N.Bolsambekov, avtorlyq qadaǵalaýdy T.Svanov júrgizedi – degen ýchastke basshysy seriktestiktiń kópqabatty turǵyn úı salýda tájirıbesi bar ekenin de atap ótti.