Tekeli qalasynda avtobýs júrgizýshileri jumyssyz qaldy

<p>TEKELІ. KAZINFORM &ndash; Jetisý oblysyndaǵy &laquo;Tekeli&raquo; avtoparkiniń jumysshylary bir-aq kúnde jumyssyz qaldy. Óıtkeni, sheneýnikter kompanııamen kelisimshartty buzǵan. Avtopark ujymy qalalyq jolaýshylar kóligi jáne avtomobıl joldary bólimi basshysynyń bul sheshimine narazy.</p>

Avtopark ákimshiligi aradaǵy kelisim buzylǵandyǵy týraly habarlamany 28 tamyz kúni alǵan. Habarlamada «Tekeli qalasy boıynsha jolaýshy tasymaly qyzmetine baıqaý ótkizilgeni» jazylǵan. Sondaı-aq, hatta tenderdi ózge kompanııa utyp alýyna baılanysty «Tekeli» avtoparkine 31 tamyz kúni jumysty toqtatý eskertilgen.

Foto: Aıbek Quttybek

«Bizge kelisimshart úzilgeni týraly 28 tamyzda saǵat 16:00-de ǵana eskertildi. Tender oınatylǵany týraly sol kúni ǵana estidik. Baıqaýdy jasyryn ótkizgen. Oǵan deıin ákimdik qyzmetkerlerinen bizdiń tarapymyzdan kemshilikter bolǵany týraly eshbir resmı hat almadyq. Jumysymyzdy minsiz atqardyq deýge bolady, 70 jyldan beri jolaýshy tasymalymen aınalysyp kelemiz. Bul sheshim ádiletsiz dep sanaımyz», - deıdi avtopark menedjeri Inga Baıkenjenova.

70 jyldyq tarıhy bar kásiporynnyń 25 qyzmetkeri túgel jumyssyz qaldy. Olardyń kóbi – tájirıbeli júrgizýshiler.

«Eń az degeni osynda 9 jyl jumys istegen. Áıtpese 40 jyl jumys istegender bar, men ózim 13 jyl jumys istedim osy avtoparkte. Bala-shaǵany asyrap, osymen kún kórip júrmiz», - deıdi Bolatbek Kóbeev.

«Júrgizýshilerdiń bári avtobýsty kelisimshart boıynsha satyp alý quqyǵymen alǵan edi. Endi biraz istesek avtobýs jekemenshigimizge óter edi. Endi jumys qalaı bolatyny belgisiz bolyp tur, avtobýstyń da jaǵdaıy belgisiz bolyp tur», - deıdi Syrymbek Muratbek.

Al, sheneýnikter bul sheshim qyzmet kórsetý sapasyn arttyrý maqsatynda jasalǵanyn jetkizdi. Qala ákiminiń orynbasary Erlan Jetibaev avtopark qyzmetin durys atqarmaǵandyqtan, qaıta baıqaý jarııalanyp, jańa kompanııamen kelisimshart jasalǵanyn aıtty.

Foto: Aıbek Quttybek

«Turǵyndardan shaǵym tústi, sebebi avtobýs toqtap qalady, synyp qalady. Aqpan aıynda avtobýs júrgizýshileri qoǵamdyq kólikti toqtatyp tastady. Biz birneshe márte bul kisilerge júrmegeni úshin, turǵyndardy durys tasymaǵany úshin uıǵarym berdik. Sol sebepten konkýrs jarııaladyq», - deıdi Tekeli qalasy ákiminiń orynbasary Erlan Jetibaev. 

Al avtopark basshysy prokýratýraǵa sheneýnikterdiń ústinen shaǵym túsiripti. Endi bul ispen quzyrly organ aınalyspaq.

Foto: Aıbek Quttybek

Eske sala keteıik, buǵan deıin Astanada 11 qoǵamdyq kóliktiń júrý baǵyty ózgergeni týraly jazǵanbyz.