Tekeli qalalyq aýrýhanasynan daý shyqty: bas esepshisi 2 mln teńge avans alǵan

<p>TALDYQORǴAN. KAZINFORM &mdash; Tekeli qalalyq aýrýhanasynyń qyzmetkerleri mekeme basshylyǵyna qatysty narazylyqtaryn bildirdi. Olar aýrýhananyń basshysy men ishki jumystaryn tolyq tekserýdi suraıdy. Medıtsına qyzmetkerleriniń shaǵymyna baılanysty oblystan arnaıy komıssııa quryldy.</p>

Tekelilik medıtsına qyzmetkerleri aýrýhananyń bas dárigeri Aslan Qalıbekov óz komandasymen kelip, olarǵa erekshe jaǵdaı jasap otyrǵanyna narazy.

Aıtýlarynsha, aýrýhanadaǵy laýazymdy qyzmetkerlerdi aýystyrǵan ol ujymǵa teń qaramaıdy. Keı qyzmetkerlerge istemegen jumysy úshin qosymsha aqy tóleıdi. Bas esepshige 2 mln teńge kóleminde jalaqy esebinen aldyn-ala aqsha bergen. Al mundaı «jomarttyq» aýrýhanada kóp jyldan beri eńbek etip kele jatqan dárigerlerdiń eshqaısysyna jasalmaǵan. 

«Jańadan kelgenderge jaǵdaı jasalyp otyr. Páter de, joǵary jalaqy da, mıllıondaǵan avans ta solardiki. Nege uzaq jyldyq ótili bar qyzmetkerler tómen aılyqpen júredi, al jańadan kelgenderge 1,5 aılyq mólsherleme taǵaıyndalady. Sondaı-aq, keı qyzmetkerlerge taǵaıyndalǵan 0,25 mólsherlemeniń zańdylyǵyn tekserýin suraımyz. Biz beıtarap tekseris júrgizilýin suraımyz» — deıdi dáriger Natalıa Dýbrovına.

Foto: Aıbek Quttybek/Kazinform

Dárigerler arasynda daý týǵyzǵan taǵy bir másele — qoımada qaraýsyz qaldy delingen dári-dármekter. 2021 jyly joıylýǵa tıis preparattardyń arasynda jaramdylyq merzimi ótpegen dáriler de bolǵan. Tekeli qalalyq aýrýhanasynyń bas meıirbıkesi neshe ret tekserý kelgenin, bári taza bolǵanyn aıtty.

Ol qoımadaǵy qorap-qorap dárilerdiń qashan, qaıdan kelgeninen beıhabar.

«Bul aýrýhanada istegenime 18 jyl boldy. Bıyl 20-mamyrdan 1-maýsymǵa deıin eńbek demalysynda júrgenimde meniń ornyma qalǵan meıirbıke eshqandaı tizimge almaı, kóptegen dári-dármekti qabyldap alǵan. Jınalys boldy. Men jınalystan soń, bas dárigerden dáriler qaıda turǵanyn suraǵanymda, „ol dáriler mende“ dedi. Bary osy. „Siz nege teksermegensiz?“ dedi. Qansha komıssııa boldy, bizde ondaı bollmaǵan. Endi bári bastalyp jatyr. Bas dáriger bizben aqyldaspaı, kóp nárseni ózi sheshedi» — dedi bas meıirbıke Janara Azatbekqyzy.

Foto: Aıbek Quttybek/Kazinform

Aýrýhana basshysy Aslan Qalıbekovke narazy ujym Memleket basshysyna úndeý joldap, qordalanǵan kóp meseleniń betin ashý úshin tekseris júrgizilýin surady. Qazir memlekettik aýdıt, prokýratýra jáne farmbaqylaý ókilderinen quralǵan arnaıy komıssııa istiń mán-jaıyn anyqtaýǵa kiristi.

«Dárigerlerdiń nazyn tyńdadym. Árıne kemshilikter bar, bas dárigerdiń de jibergen kemshilikteri bar, jalpy aıtylǵan máselerin tyńdap arnaıy jumys tobyn qurdyq. Tekseris bitkenshe bir dáriger jumystan shyqpaıdy, eshkimdi qýdalamaıdy. Negizgi talaptary bas dáriger óz komandasyn alyp keldi dep otyr. Iá, jumysqa qabyldaǵan adam sany — 9. Bárin zań júzinde tekseremiz. Anyqtap bolǵan soń, sheshim shyǵady» — dedi Jetisý oblysy ákiminiń orynbasary Márlen Kólbaev. 

Burynǵy qyzmetkerler men jańadan jumysqa turǵandar arasyndaǵy daý ýshyǵyp tur. Máseleniń aq-qarasy anyqtalǵansha naýqastar zardap shege me dep alańdaıdy keı aq halattylar.

Eske salaıyq buǵan deıin Jetisýda medbıke naýqastardyń atynan 6 mln teńgege jýyq nesıe rásimdegenin jazǵanbyz.