Tehnıkalyq jáne kásiptik bilim berýge memlekettik tapsyrys 45 myń orynǵa artady – BǴM

NUR-SULTAN. QazAqparat – Bıyl tehnıkalyq jáne kásiptik bilim berýge memlekettik tapsyrys 45 myń orynǵa artyp, 125 myń tegin grant bólinedi. Bul týraly QR BǴM Tehnıkalyq jáne kásiptik bilim departamentiniń dırektory Nasymjan Ospanova málim etti, dep habarlaıdy QazAqparat tilshisi.

«Jastardy suranysqa ıe mamandyqtar boıynsha tegin tehnıkalyq jáne kásiptik bilimmen 100 paıyz qamtý úshin memlekettik tapsyrysty ulǵaıtý kerek. Osy oraıda bıyl respýblıkalyq bıýdjet esebinen memlekettik tapsyrys 45 myń orynǵa artady. Sonymen qatar ákimdikter de memlekettik tapsyrys boıynsha 80 myń oryndy josparlap otyr. Jalpy kolledjderde tegin bilim alýǵa 125 myń oryn beriledi. Prezıdenttiń tehnıkalyq jáne kásiptik bilim berýdi qaıta qaraýǵa qatysty tapsyrmasy barshamyzǵa aıan», - dedi Nasymjan Ospanova Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, 2025 jylǵa deıin memlekettik tapsyrystyń 70 paıyzy tehnıkalyq mamandyqtarǵa beriledi.

«Qazir ol kórsetkish 45 paıyzdy quraıdy. Mamandyqtarǵa kelsek, metallýrgııa, IT, qurylys, ınjenerııa, mashına jasaý taǵy sol sııaqty. Búgingi tańda arnaıy komıssııalar óńirlerde eńbek naryǵynda suranysqa ıe mamandyqtardyń tizbesin jasaqtaýda. Nátıjesinde kerek mamandyqtar boıynsha oryn sandaryn bekitedi. Bıyl 30 sáýirden bastap bilim basqarmalary memlekettik tapsyrys bólingen mamandyqtar týraly aqparatty resmı saıttarynda ornalastyrady», - deıdi ol.