Tehnıkalyq baǵyttar boıynsha mamandar daıarlaımyz- Marat Syrlybaev
Bul barlyq qoǵam damýynyń mańyzdy faktory. Negizgi basymdyq – sapaly bilimge degen qoljetimdilikti arttyrý. Shoqan Ýálıhanov atyndaǵy Kókshetaý ýnıversıtetiniń rektory, ekonomıka ǵylymdarynyń kandıdaty Marat Syrlybaev osylaı deıdi, habarlaıdy QazAqparat tilshisi.
«Prezıdent osy mindetterdi júzege asyrý úshin Úkimetke bilim granttarynyń sanyn kóbeıtý, shalǵaı aımaqtardy bilikti muǵalimdermen qamtamasyz etý jáne elimizde shet eldiń ozyq ýnıversıtetteriniń fılıaldaryn ashý tárizdi tapsyrmalar berdi. Onyń ishinde tehnıkalyq mamandyqtardy ıgerý qajettigine toqtaldy. Osy rette Sh.Ýálıhanov atyndaǵy Kókshetaý ýnıversıtetinde pedagogıkalyq mamandyqtardan basqa, birneshe tehnıkalyq baǵyttar boıynsha mamandar daıarlanatynyn erekshe aıtqym kelip otyr. Olardyń ishinde taý-ken óndirý jáne qaıta óńdeý ónerkásibi, ınjenerlik jáne kólik, aqparattyq-kommýnıkatsııalyq tehnologııalar salalary bar. Buǵan qosa, qurylys, mashına jasaý, kólik, taý-ken isi, qaıta óńdeý tehnologııalary salalaryna da mamandar daıarlaımyz», - deıdi Marat Syrlybaev.
Rektordyń aıtýynsha, ótken jyly tehnıkalyq mamandyqtar boıynsha atalmysh ýnıversıtetti 211 túlek aıaqtap shyqqan. Olardyń jumysqa ornalasý kórsetkishi ortasha eseppen 85 paıyzdy qurady. Bul – joǵary kórsetkishterdiń biri. Qazirgi ýaqytta osy salada 1057 stýdent bilim alyp jatyr. Onyń ishinde «Serpin» memlekettik baǵdarlamasy boıynsha 225 stýdent blim alyp jatyr.
«Stýdentterimiz jyl saıyn «Altyntaý – Kókshetaý», «Tynys» aktsıonerlik qoǵamdary men «KAMAZ-Injınırıng», «Kazrostınjınırıng», «Bazıs B», «Kokshetaýgorselproekt», «Alýa-stroı», «Regıon-stroı», «Agromer Astyq» jaýapkershiligi shekteýli seriktestikterinde jáne iri taý-ken baıytý kombınattary men qurylys fırmalarynda, óńirdiń basqa da jetekshi kásiporyndarynda tájirıbeden ótedi. Óndiris oryndarynda tek qana tehnıkalyq mamandyqtar boıynsha kafedralarymyzdyń 10 fılıaly jumys isteýde. Al, barlyǵyn qosa alǵanda, mundaı fılıaldar bizde 29. Munyń ózi ýnıversıtetimiz mamandardy daıarlaýda óńirdegi iri kásiporyndarmen tyǵyz yntymaqtastyq qarym-qatynas ornatqandyǵyn bildiredi», - dep tolyqtyrdy Marat Syrlybaev.
Rektor atap ótkendeı, búgingi kúni atalmysh oqý ornynyń qatysýymen «Tynys» jáne «Tıo-laın» aktsıonerlik qoǵamdarynda 200 mıllıon teńgeni quraıtyn 3 iri joba júzege asyrylýda. «Qurylys» mamandyǵynyń stýdentteri Reseı Federatsııasynyń Tomsk memlekettik qurylys ýnıversıtetinde akademııalyq utqyrlyq baǵdarlamasy boıynsha bir semestr bilim alyp keldi. Sonymen qatar, tehnıkalyq mamandardy daıarlaýdy kúsheıtý maqsatynda 2021 jyly Sankt-Peterbýrgten professor Talal Avad syrtqy akademııalyq utqyrlyq baǵdarlamasy boıynsha ýnıversıtet stýdentterine dáris oqyp, professor-oqytýshylarmen tájirıbe almasty. Bul tájirıbe áli de jalǵaspaqshy. Osy maqsatta 2022 jylǵa shaqyrylatyn sheteldik professorlardyń tizimi Qazaqstan Respýblıkasy Bilim jáne ǵylym mınıstrligine bekitýge joldandy.
«Prezıdenttiń sózinde aıtylǵanyndaı, qoǵamnyń damýynda bilim berý jáne mádenıet salasyn da esten shyǵarýǵa bolmaıdy. Ásirese, birinshi kezekte jastar bilimdi bolýy kerek. Óıtkeni, bilimdi azamattar shynaıy kásibı básekelestikte mereıi ústem bolyp, tabysty jáne laıyqty ómirge kóbirek qadam jasaı alady. 60 jyldyq tarıhy bar irgeli bilim ordamyz óziniń aldaǵy damý baǵytyn tek qana Prezıdentimiz Q.K.Toqaevtyń jańa baǵyttaǵy jańa Qazaqstannyń aldyna qoıǵan mańyzdy mindetterimen baılanystyryp otyr», - dep túıindedi Marat Syrlybaev.