Tehnıka jaldap, qurylys ımıtatsııasyn jasaǵan: Astanada qarjy pıramıdasy anyqtaldy
Qarjylyq monıtorıng agenttiginen málim etkendeı, sengish azamattarǵa ınvestıtsııalanǵan somanyń 70% deıingi passıvti aı saıynǵy tabys ýáde etilip, aqshalaryn túrli ınvestıtsııalyq jobalarǵa salýǵa shaqyrdy.
«Bul qarjy pıramıdasy ózin syrtqy ekonomıkalyq qyzmetpen aınalysatyn kompanııa retinde kórsetken.
«Upgrade-AS», «Holding AS», «XAS-Logistic», «light-AS» jáne basqa da kompanııalardyń atynan salymshylarmen kelisimsharttar jasalǵan.
Salymshylar úshin mindetti sharttardyń biri 180 000 teńgege Qytaıdan ákelindi delingen turmystyq taýarlardy satyp alý boldy.
Pıramıdanyń turaqty jumysynyń kórinisin jasaý úshin alynǵan aqshanyń bir bóligi salymshylarǵa syıaqy tóleýge baǵyttalyp otyrǵan. Alaıda uıymdastyrýshylar salymshylardy alǵan syıaqysyn pıramıdaǵa qaıta salýǵa shaqyrǵan», - delingen vedomstvo habarlamasynda.
«HAS Holding» qarjy pıramıdasyn uıymdastyrýshylar áleýmettik jelilerde ara-tura jalǵan aktsııalardy uıymdastyryp kelgen. Sonyń ishinde Astana men Qosshy qalalarynda kópqabatty úıler salynyp jatqanyn kórsetý úshin qurylys dekoratsııalary men arnaıy tehnıkany jalǵa alǵan.
Túsip jatqan aqshanyń kóp bóligin uıymdastyrýshylar óz qaltasyna basyp otyrǵan.
«Qysqa merzimde salymshylardan alynǵan aqshaǵa uıymdastyrýshylar men olardyń týystarynyń atyna birqatar jyljymaly jáne jyljymaıtyn múlik (jer telimderi, páterler, avtokólikter) resimdegen.
Qarjy pıramıdasyn uıymdastyrdy degen kúdikti ustalyp, ýaqytsha ustaý ızolıatoryna qamaldy. Oǵan qatysty sot sanktsııasymen «qamaýda ustaý» bultartpaý sharasy tańdaldy.
Qazir ýaqytta salymshylar arasynda jalǵan aqparat taralyp jatyr. Osyǵan baılanysty tek resmı aqparatqa senýdi suraımyz», - delingen Qarjylyq monıtorıng agenttiginiń baspasóz qyzmeti usynǵan aqparatta.
«HAS Holding» qarjy pıramıdasynyń qyzmetinen zardap shekkender kelesi nómirge habarlasa alady: 8 (7182) 61-33-05.