«Tegińdi qazaqshalap, telefon utyp al»: Baıanaýylda erekshe utys jarııalandy

<p>PAVLODAR. KAZINFORM — Baıqaýǵa jasy on altydan asqan, jeke kýálik nemese tólqujatty jańadan alǵan kez kelgen azamat qatysa alady. Jeńimpazdar Naýryz meıramynda marapattalady.</p>

Halyqaralyq «Qazaq tili» qoǵamy» qoǵamdyq birlestiginiń Baıanaýyl aýdandyq fılıaly «Tegińizdi qazaqshalap, telefon utyńyz» atty utys oıynyn jarııalady.

«Utys oıynynyń sharttary qarapaıym. Aty-jónińiz ben tegińizdi „Halyqqa qyzmet kórsetý ortalyǵyna“ baryp qazaqshalaǵan soń 1414 nómirinen kelgen habarlamany skrınshot jasap, eski jáne almastyrylǵan aty-jónińiz ben mekenjaıyńyzdy tolyq jazyp, 87056002260 whatsapp nómirine joldaýyńyz qajet. Aty-jóni burynnan qazaqsha jazylǵan azamattar qatysa almaıdy. Utys oıynynyń jeńimpazdary Instagram-daǵy @qazaqtili_qogamy_baianauyl paraqshasynda tikeleı efırde anyqtalady», dep habarlady birlestik fılıalynyń tóraǵasy Musabek Seısenbekuly.

Júldege SAMSUNG A34 markaly eki smartfon tigiledi. Jeńimpaz 19 naýryz kúni anyqtalyp, Baıanaýyl aýylynda ótetin Naýryz meıramyna arnalǵan kontserttik baǵdarlamada marapattalady.