Tegin júretin elordalyqtardan aldaǵy 10 kún avtobýs kartasy suralmaıdy

ASTANA. QazAqparat - Astanadaǵy qoǵamdyq kólikte tegin júrý quqyǵyna ıe azamattar 15 qańtarǵa deıin elektrondyq kóliktik kartany kórsetpeı, rastaýshy qujatymen tegin júre alady, dep habarlaıdy «QazAqparat» HAA tilshisi qala ákiminiń baspasóz hatshysy Elvıra Júrgenbaevaǵa silteme jasap.

«Astanada búgingi tańda qoǵamdyq kólikte júrýde jeńildikke ıe 90 myń turǵyn bar. 2018 jyly jeńildikke ıe bolǵan azamattardyń barlyǵynyń elektrondyq kartasy bolýy kerektigi týraly buǵan deıin habarlanǵan bolatyn. Búgingi tańda «Astana LRT» JShS 70 myń jeńildik kartasyn taratty», - dep jazdy Elvıra Júrgenbaeva Feısbýktegi paraqshasynda.

Onyń aıtýynsha, qańtardyń alǵashqy kúnderi Q.Muńaıtpasov kóshesindegi Tólem júıesi boıynsha departamenttiń Ortalyq kassasynda uzyn-sonar kezek týyndaǵan.

«Osyǵan baılanysty qala turǵyndaryn sabyrǵa shaqyramyz. 15 qańtarǵa deıin jeńildikke ıe azamattarǵa ózimen birge elektrondyq kóliktik karta alyp júrý mindetti emes. Jeńildikke ıe azamattyń mártebesin (quqyǵyn) rastaıtyn (jeke kýáligi nemese t.b) qujat qoǵamdyq kólikti tegin júrýge múmkindik beredi», - dep jazady ol.

Baspasóz hatshysy sonymen birge, aldaǵy ýaqytta jeńildikke ıe azamattarǵa ózimen birge elektrondyq kóliktik kartasyn alyp, ony mindetti múrde valıdatsııadan ótkizý asa mańyzdy ekenin eskertedi. 

«Bul kartalar kondýktorlarǵa jeke kýálikti  nemese zeınetaqy kitapshasyn kórsetý mashaqatynan aryltady», - delingen habarlamada.