Tegin medkómektiń kepildi kólemi kópshilikke qoljetimdi bolady

ALMATY. QazAqparat - Tegin medıtsınalyq kómektiń kólemi qoljetimdi bolady. Bul týraly ÁMSQ Almaty qalasy boıynsha fılıalynyń dırektory Tileýhan Ábildaev aıtty, dep habarlaıdy QazAqparat tilshisi.

2020 jyly qazaqstandyqtar medkómekti eki paket boıynsha ala bastaıdy. Birinshisi – memlekettik kepildeme boıynsha kórsetiletin jáne respýblıkalyq bıýdjetten qarjylandyrylatyn tegin medqyzmetter. Ekinshi paket mindetti medıtsınalyq saqtandyrý júıesine qatysatyndarǵa arnalǵan.

«Jalpy, tegin medkómektiń kepildi kólemi saqtandyrý júıesindegi mártebesine qaramastan elimizdiń barlyq turǵyndaryna qoljetimdi bolady. Onyń quramyna jedel medıtsınalyq kómek, sanıtarlyq avıatsııa, shuǵyl statsıonarlyq kómek, pallıatıvti kómek engen», - dedi qala ákimdiginiń baspasóz ortalyǵynda ótken brıfıngte ÁMSQ Almaty qalasy boıynsha fılıalynyń dırektory Tileýhan Ábildaev.

Sondaı-aq, áleýmettik mańyzy bar aýrýlarǵa da jeńildikter qarastyrylǵan. Sozylmaly aýrýlar kezinde konsýltatıvti-dıagnostıkalyq kómek, ambýlatorııalyq dárimen qamtý, josparly jáne statsıonarlyq kómek, týberkýlezge ushyraǵanda medıtsınalyq ońaltý qoljetimdi bolady.
«Mindetti medsaqtandyrý paketine konsýltatıvti–dıagnostıkalyq kómek, onyń ishinde qymbat zerthanalyq qyzmetter, tegin medkómektiń kepildi kóleminen tys (TMKKK) ambýlatorııalyq dárimen qamtý, josparly jáne statsıonarlyq kómek, TMKKK aıasynda emdelgen jaǵdaıda ǵana medıtsınalyq ońaltý jáne emdeý qaıta júrgiziledi» - dep qosty Tileýhan Ábildaev.
Sondaı-aq, T. Ábildaev tegin medıtsınalyq kómek paketiniń elimizdiń barlyq turǵyndary úshin shaǵyn áleýmettik standart bolatynyn jáne shuǵyl ári kezek kúttirmeıtin jaǵdaılarda qoldanylatynyn aıtty. Al, mindetti saqtandyrý paketi qalǵan barlyq medkómekter tizimin qamtyp, saqtandyrylǵan árbir jannyń ómir súrý sapasyn jaqsartýǵa jáne qazaqstandyqtardyń bolashaq urpaǵynyń densaýlyǵyn saqtaýǵa baǵyttalady.