«Tegin ári tolyqqandy tekserdi»: Altaı turǵyndary «Salamatty Qazaqstan» poıyzynyń jumysyn oń baǵalap jatyr

ALTAI. QazAqparat – «Salamatty Qazaqstan» medıtsınalyq poıyzy búginnen bastap Shyǵys Qazaqstan oblysyndaǵy Altaı beketinde jergilikti jurtty qabyldap jatyr. Tańerteńnen túske deıin aq halattylar barlyǵy 100-ge jýyq adamdy tekserdi, dep habarlaıdy QazAqparat tilshisi.

«Salamatty Qazaqstan» poıyzyndaǵy bilikti dárigerlerdiń qabyldaýynan qur qalyp qalmas úshin Altaı aýdanynyń ár aýylynan turǵyndar aǵylýda. Árkim ózin mazalaǵan suraqtarǵa jaýap alyp, dertine shıpa tapqysy keledi. Al keıbireýler profılaktıkalyq maqsatta dárigerge kórinýdi maqsat etipti. Jınalǵan halyqtyń deni – egde jastaǵylar.

QazAqparat tilshisi poıyzdan shyǵyp kele jatqan altaılyqtardy áńgimege tartyp kórdi.

«Dárigerler bizdi óte jaqsy qarsy aldy. Ár suraǵymyzdy tyńdap, muqııat jaýap berdi. Ózim okýlıstke tekserildim. Sebebi kózim durys kórmeı júr. Meni arnaıy qurylǵylarmen tekserip, em-dom taǵaıyndap berdi. Olarǵa kóp rahmet!», - deıdi Baqytbek Baıǵunanov.

Óz sózinde ol Zýbovka aýylynda turatynyn jetkizdi. Medıtsınalyq poıyzdyń keletinin aýyldastarynan estip qalǵan.

Altaı qalasynyń turǵyny Altynaı Nurlybaeva «Salamatty Qazaqstan» poıyzynyń jumysyn joǵary baǵalap, halyq densaýlyǵyn jaqsartýǵa baǵyttalǵan osyndaı sharalardyń kóp bolǵanyn qalaıtynyn tilge tıek etti.

«Poıyzdaǵy dárigerlerdiń barlyǵy joǵary bilikti eken. Dárigerlerge túgel derlik qaralyp shyqtym. Tegin ári tolyqqandy tekserdi. Ýltradybystyq zertteýden de óttim. Sol zertteýdi júrgizetin áıel óte mádenıetti, óz isiniń sheberi ekendigin kórsetti. Barlyǵyna myń da bir alǵys! Bizdiń óńirge jıi kelip turyńyzdar!», - deıdi ol.

Al Nıkolsk aýylynan kelgen zeınetker de okýlıstke qaralypty. Ol osy poıyz týraly aýdandyq gazetten oqyǵan.

«Poıyzdy kesheden beri taǵat tappaı tosyp júrdim. Búgin mine tańerteń erte kelip qaralyp shyqtym. Meniń kózim aýyrady. Koronavırýs pandemııasy kezinde kózimniń kórý qabileti óte qatty nasharlap ketti. Sodan keıin ota jasatqanmyn», - deıdi ıÝlııa Nıkolaevna.

Dárigerler patsıenttiń kózin zamanaýı qurylǵylarmen muqııat tekserip, em taǵaıyndap, kózge tamyzatyn dári jazyp bergen.

Osylaısha, altaılyqtar «Salamatty Qazaqstan» poıyzynyń jumysyn oń baǵalap, shynaıy rızashylyqtaryn bildirip jatyr. Túsken keıin jáne erteń de jurttyń az kelmeıtini anyq. Sodan soń poıyz Kúmistaý beketine qaraı baǵyt alady. Jalpy Shyǵys Qazaqstan men Abaı oblystaryn 12 maýsymǵa deıin aralamaq.