Tegin advokattyq kómek qandaı jaǵdaıda kórsetiledi

ASTANA. QazAqparat – Búgingi tańda respýblıka boıynsha keshendi áleýmettik zań kómegi 2 myńnan astam azamatqa kórsetildi. Bul týraly ortalyq kommýnıkatsııalar qyzmetinde ótken brıfıng barysynda Ádilet vıtse-mınıstri Alma Muqanova aıtty, dep habarlaıdy QazAqparat tilshisi.

«Advokattardyń memleket kepildik bergen zań kómegin kórsetý jónindegi qyzmetin uıymdastyrýdy advokattar alqasy qamtamasyz etedi. Іsterdi taǵaıyndaý boıynsha bólýdi alqa júzege asyrady jáne esepke alý jýrnalynda tirkeıdi. Zań kómegin kórsetý týraly jekelengen shart bolǵan jaǵdaılardy qospaǵanda, advokatqa iske óz erkimen qatysýǵa tyıym salynady. Naqty sebep bolmaǵan jaǵdaıda advokattyń isten bas tartýǵa quqyǵy joq. Memleket kepildik bergen zań kómegin muqtaj adamdar ony turǵylyqty mekenjaıyna jáne ornalasqan jerine qaramastan Qazaqstan Respýblıkasynyń aýmaǵynda alýǵa quqyly», - dep málim etti Alma Muqanova.

Memleket kepildik bergen zań kómegi aıasynda azamattarǵa qyzmet tegin kóretiledi.

«Mundaı kómekti advokattar men zań konsýltanttary klıent zań kómegine júgingen sátten bastap quqyqtyq jaǵdaı sheshilgenge deıin ony tolyq súıemeldeı otyryp, óteýsiz jáne erikti negizde kórsetedi. Búgingi tańda búkil respýblıka boıynsha keshendi áleýmettik zań kómegi 2 myńnan astam azamatqa kórsetildi», - dedi vıtse-mınıstri.

Qosa ketsek, 2 jyldyń ishinde 22 myńnan asa qazaqstandyqqa advokat elektrondy formatta taǵaıyndalǵan.

Sonymen qatar, bıyl ádilet organdaryna memleket kepildik bergen zań kómegin kórsetý kezinde advokattardyń áreketterine qatysty 12 shaǵym túsken.