Tegeran Brıýsseldiń ıadrolyq kelisim týraly usynystaryna jaýap berdi

NUR-SULTAN. QazAqparat – Iran Eýropalyq Odaqqa Brıýsseldiń ıadrolyq baǵdarlama boıynsha halyqaralyq kelisimdi qalpyna keltirý jónindegi ymyraǵa kelý usynystaryna jaýap jiberdi. Jaýaptyń mazmuny ázirge jarııalanǵan joq. Eýropalyq komıssııanyń Tegeran jaýabyna alǵashqy reaktsııasy ustamdy boldy, dep habarlaıdy QazAqparat euronews-ke silteme jasap.

«Men tek keshe keshkisin Irannan jaýap alǵanymyzdy rastaı alamyn. Qazirgi ýaqytta biz onymen tolyqtaı tanysyp, Birlesken keshendi is-qımyl josparynyń basqa múshelerimen jáne AQSh-pen aryqaraı qalaı áreket etý kerektigi jóninde keńesip jatyrmyz», - dedi Eýrokomıssııanyń resmı ókili Nabıla Massralı.

Iranda ıadrolyq qarýdyń paıda bolýyna jol bermeýge, biraq bul eldiń beıbit atomǵa quqyǵyn qamtamasyz etýge arnalǵan Iran ıadrolyq baǵdarlamasy jónindegi is-qımyl jospary BUU Qaýipsizdik keńesiniń bes turaqty múshesiniń jáne Germanııanyń qatysýymen 2005 jyldan 2015 jylǵa deıin ázirlendi. Biraq, 2018 jyly AQSh Kelisimnen shyǵatynyn jáne Iranǵa qatysty ekonomıkalyq sanktsııalar engizý týraly jarııalady. Buǵan jaýap retinde Iran ýran baıytý jumystaryn qaıta bastady. 2021 jyly AQSh bıligi aýysqannan keıin halyqaralyq kelisim jónindegi kelissózder qaıta jalǵasty. Eýroodaq AQSh pen Iran úkimetteri arasynda deldal rólin aldy.

Brıýssel Tegerannyń óz usynystaryna bergen jaýabyn Vashıngtonǵa joldady.

Eske salsaq, Iranmen ıadrolyq kelisimdi qalpyna keltirý jónindegi kelissózderden keıin munaı baǵasy barreline 1 dollardan astam arzandady. Tegeran eksportty ulǵaıtýy múmkin degen boljam jasalǵan.

Foto:euronews.com