TDM qaǵıdattaryn engizý halyqtyń ómir súrý sapasyn edáýir jaqsartady - Álıhan Smaıylov
Bul týraly QR Premer-Mınıstriniń birinshi orynbasary Álıhan Smaıylovtyń tóraǵalyǵymen ótken Turaqty damý maqsattary jónindegi úılestirý keńesiniń (TDM) V otyrysy kezinde belgili boldy.
Atap aıtqanda, Covid-19-tan keıingi kezeńdegi TDM-ǵa qol jetkizýdegi jetistikter, damý maqsatynda qarjylandyrýdy baǵalaý nátıjeleri, TDM ulttyq ındıkatorlary jáne BUU-nyń 2021-2025 jyldarǵa arnalǵan turaqty damýdyń jańa shekti baǵdarlamasyn iske asyrý máseleleri qozǵaldy.
TDM baǵdarlamalary 5 topqa bólinip, syrtqy ister, eńbek jáne halyqty áleýmettik qorǵaý, ulttyq ekonomıka, aqparat jáne qoǵamdyq damý, energetıka mınıstrlikterine bekitildi. Ár saladaǵy jaýapty tulǵalar kezdesýge qatysýshylarǵa baǵdarlamalardyń oryndalý barysy, 2020 jylǵy jumys nátıjeleri týraly habardar etti jáne Qazaqstan men BUU-nyń aldaǵy besjyldyqtaǵy yntymaqtastyǵy týraly áńgimeledi. Sondaı-aq, 2030 jylǵa deıingi TDM ulttyq ındıkatorlarynyń tizimi talqylandy. Bul tizim 200-den astam tarmaqty qamtıdy.
Premer-Mınıstrdiń birinshi orynbasary Álıhan Smaıylov TDM qaǵıdattaryn iske asyrý halyqtyń ómir súrý sapasyn edáýir jaqsartýǵa, ony halyqaralyq standarttarǵa jaqyndatýǵa jáne halyqaralyq ımıdjdi nyǵaıtýǵa múmkindik beretinin atap ótti.