Tbılısıdegi alapat sý tasqynynyń yqtımal sebebi ataldy

ASTANA. QazAqparat - Grýzııa astanasy Tbılısıdegi birneshe saǵat boıy jaýǵan nóser jańbyr saldarynan oryn alǵan alapat sý tasqynynyń sebepteriniń biri Vere ózeniniń ańǵaryn laı kóshkinniń bitep qalýy bolýy múmkin. Bul týraly Grýzııanyń qorshaǵan ortany qorǵaý jónindegi Ulttyq agenttiginiń geologııa departamentiniń bastyǵy Merab Gaprındashvılı aıtty.

Onyń aıtýynsha, laı kóshkini saldarynan jasandy sý qoımasy paıda bolyp, nátıjesinde sý tasqyny oryn alǵan, dep jazady TASS.

«Ózen ańǵaryna jınalǵan sý paıda bolǵan dambyny buzyp ketip, aǵashtardy julyp áketken, laı topyraqty da qamtyp, saldarynan qasiretti jaǵdaı oryn aldy», - dedi Gaprındashvılı.

Osyǵan deıin habarlaǵanymyzdaı , birneshe saǵat tolastamaǵan nóser jaýyn Grýzııa astanasy Tbılısı qalasynyń birneshe aýdandaryn sý basýǵa ákep soqty. Aýlalardy, birinshi qabattardy, jerasty ótkelderin, júzdegen úılerdiń jer tólelerin sý basty. Sý basqan haıýanattar baǵynan alty arystan, alty jolbarys, jeti aıý, 13 qasqyr qashyp ketken.

Qazirgi sátte 12 adamnyń ajal qushqany málim, ondaǵan otbasylar úısiz-kúısiz qaldy. 15 maýsym osy eldegi sý tasqynynan qaza tapqandardy eske alýǵa oraı qaraly kún dep jarııalady.

Tbılısı merıi men ІІM qutqarý qyzmetiniń qyzmetkerleri, sonymen qatar Grýzııanyń ÁK bólimsheleriniń áskerı qyzmetkerleri apat aımaǵynan 100-den astam adamdy qutqardy, olardyń 15-i aýrýhanaǵa jatqyzyldy.