Tbılısıde sherýshiler polıtsııamen qaqtyǵysty

<p>ASTANA. KAZINFORM &ndash; Tbılısıde (Grýzııa) parlament ǵımaratynyń janynda sherýshiler men polıtsııa qyzmetkerleri arasynda qaqtyǵys boldy, dep habarlaıdy <a href="https://tass.ru/mezhdunarodnaya-panorama/22529207" target="_blank" rel="noopener">TASS </a>aqparat agenttigi.&nbsp;</p>

Tártip saqshylarymen tóbeles zań shyǵarýshy organ ǵımaratynyń eki jaǵynda bolyp jatyr. Polıtsııa parlamenttiń qyzmettik kireberisine barǵysy kelgen narazylyq bildirýshilerdi kúshpen qýyp shyǵýǵa tyrysyp jatyr. Tártip saqshylary buryshtalǵan gaz qoldanýǵa májbúr. Ázirge qamaýǵa alynǵandar tirkelgen joq.

Sherýshilerge Grýzııa prezıdenti Salome Zýrabıshvılı de qosyldy. Ol bılikti parlament saılaýyn qaıta ótkizýge shaqyrdy.

Tbılısıdegi stıhııaly sherý premer-mınıstr Iraklıı Kobahıdzeniń beısenbi kúni bıliktegi «Grýzın armany-Demokratııalyq Grýzııa» partııasy Eýroodaqqa kirý týraly kelissózder máselesin 2028 jyldyń sońyna deıin kún tártibine qospaý jáne qaýymdastyq tarapynan bıýdjettik granttardan bas tartý týraly sheshim qabyldaǵanyn málimdegennen keıin bastaldy.

Úkimet basshysynyń aıtýynsha, buǵan EO-nyń dıalogty bastaý taqyryby retinde únemi bopsalaýy, parlament qabyldaǵan birqatar zańnyń kúshin joıýdy talap etýi jáne grýzın bıligine qarsy sanktsııalar salýǵa shaqyrýy sebep boldy.

Buryn habarlanǵandaı, bılik partııasy el prezıdenttigine burynǵy fýtbolshy Mıhaıl Kavelashvılıdi usyndy.

Grýzııa oppozıtsııasy 26 qazandaǵy saılaýdan keıin narazylyq sherýlerin turaqty túrde ótkizýge ýáde berdi.

Eske salsaq, Grýzııa parlamenti jalpy otyrysta prezıdent saılaýynyń merzimin belgiledi.

Daýys berýge parlamenttiń 85 depýtaty tirkeldi. 80 depýtat caılaýdy 14 jeltoqsanda ótkizýdi qoldap, birde-biri qarsylyq bildirmedi.