Tazy men tóbetti saqtaý máseleleri boıynsha zań jobasy ázirlendi
Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetinen málim boldy, dep habarlaıdy QazAqparat tilshisi.
«Mamandardyń pikirinshe, búgingi tańda qazaqy tazy jáne tóbet tuqymynyń tazalyǵyn saqtaýǵa qatysty qıyndyqtar bar jáne bul ıt tuqymdarynyń joıylý qaýpi saqtalyp tur. Bul turǵyda genofond jaǵdaıyn baǵalaý men olardyń genetıkalyq profılin qurý boıynsha ǵylymı zertteýler júrgizýdiń zańnamalyq tártibiniń joqtyǵy keri áser etip otyr. Osy oraıda Memleket basshysynyń tapsyrmasy boıynsha depýtattyq korpýs qazaqy tazy men tóbetti saqtaý jáne kóbeıtý týraly zań jobasyn ázirledi», - delingen komıtet málimetinde.
Zań jobasy osy saladaǵy memlekettik retteýdiń negizgi qaǵıdattaryn belgileý arqyly atalǵan ıt tuqymdarynyń saqtalýy men kóbeıtý salasyndaǵy sýbektilerdiń qyzmetin quqyqtyq retteýde keshendi qadamdardy qamtyp otyr.
Osy oraıda qazaqy ulttyq asyl tuqymdy ıt túrleriniń standarty paıda bolady. Bul ıt tuqymdaryn saqtaý jáne olardy kóbeıtý salasyndaǵy qyzmetti zań jobasyna sáıkes jeke tulǵalarmen qatar, zańdy tulǵalar da júzege asyra alady. Zań 2023 jyldyń 1 shildesinen bastap kúshine enedi dep josparlanyp otyr.
Atalǵan komıtet quramyndaǵy Janýarlar dúnıesi jáne ańshylyq sharýashylyǵy basqarmasy basshysy Qýat Chýmakaev zań jobasyna Parlament depýtattary bastamashylyq etkenin aıtty.
«Bizdiń vedomstvo bul saladaǵy máselelermen aınalysqandyqtan, ókiletti organ retinde bekitildi. Qujatty QR Prezıdentiniń Іs Basqarmasy janyndaǵy Parlamentarızm ınstıtýty daıarlady. Bizdiń maqsat – zań jobasy aıasynda ózimizdiń tıisti usynystarymyzdy ázirleý. Qujat Parlament Májilisinde jumys toby otyrystarynda qaralyp jatyr», - dedi basqarma basshysy.
Qazir basty máselelerdiń biri - ıt túrleriniń tazalyǵyn saqtaý. Qazaq tazysy men tóbetterdiń shyǵý tegi týraly halyqaralyq rastalǵan qujattary joq. Óıtkeni bul tuqymdar halyqaralyq kınologııalyq birlestikter jaǵynan moıyndalmaǵan.
Taza qandy ıtterdi tirkeý úshin eki máseleni eskerý qajet. Birinshiden, ıt tuqymynyń standarty. Ekinshiden, taza qandy ıtterdiń tısti sany jınaqtalýy tıis.
Atap aıtqanda, memlekettiń qarjylandyrýymen asyl tuqymdy tazy men tóbetti ósirý turǵysynda ulttyq murany saqtaýdyń mańyzdylyǵyna memleket erekshe kóńil bólip otyrǵanyn bildiredi.
Zań jobasy aıasynda taza qandy tazy men tóbet tuqymyn saqtaý jáne kóbeıtýmen, sarapshylar men mamandar daıarlaýmen, kórmeler men túrli dárejedegi baıqaýlar uıymdastyrýmen, sondaı-aq standart ázirleýmen, tazy jáne tóbet tuqymdarynyń shyǵý tegi týraly kýálikter berýmen aınalysatyn Qazaqy ıt tuqymdarynyń ulttyq ortalyǵyn qurý josparlanyp otyr.
Budan buryn habarlanǵandaı, bıyl kúzde QR Prezıdentiniń Іs Basqarýshysy Aıbek Dádebaev qazaqy ıt tuqymdary tazy men tóbetti saqtaý jáne qalpyna keltirý máseleleri boıynsha kezekti jıyn ótkizdi.
Foto: gas-kvas.com