Tájirıbeli geologtardyń bári zeınet jasyna taıap qaldy - mınıstr

ASTANA. QazAqparat – Ekologııa, geologııa jáne tabıǵı resýrstar mınıstri Serikqalı Brekeshev Úkimet otyrysynda elde tájirıbeli geologtardyń ornyn almastyratyn mamandar tapshy ekenin málim etti, dep habarlaıdy QazAqparat tilshisi.

«Kadrlyq jáne ǵylymı qamtamasyz etý máseleleri salaǵa aıtarlyqtaı áser etedi. Bizde arnaıy baǵyttaǵy mamandardyń jetispeýshiligi aıqyn kórinis tabýda. Sonymen qatar qazirgi ýaqyttaǵy tájirıbeli geologtardyń ortasha jasy zeınetkerlikke jaqyn. Al jaqynda ǵana oqýyn aıaqtaǵan jas mamandar sandyq jáne sapalyq quramy jaǵynan suranysty qanaǵattandyrmaı otyr.

Óz kezeginde ǵylymı geologııalyq uıymdar jer qoınaýyn zertteý jáne geologııalyq barlaý boıynsha praktıkalyq jumystarǵa az qatysady», - dedi ol.

Vedomstvo basshysy geologııa salasyn ǵylymı-zertteý jáne kadrlyq qamtamasyz etý problemalaryn sheshý úshin salalyq nusqaýlyqtar men ádistemelik usynymdar ázirlenetinin aıtty.

«Ǵylymı uıymdar jer qoınaýyn memlekettik geologııalyq zertteýge tartylatyn bolady jáne geologııalyq barlaý jumystaryn jolǵa qoıýdyń ozyq ǵylymı negizdemesin qamtamasyz etedi.

Arnaıy baǵyttaǵy mamandardy nysanaly daıarlaý júrgiziletin bolady, sondaı-aq qaıta daıarlaý jáne biliktilikti arttyrý kýrstary uıymdastyrylady. Stýdentter jer qoınaýyn memlekettik geologııalyq zertteý obektilerinde óndiristik praktıkadan ótetin bolady.

Bul praktıkalyq deńgeıin jaqsartýǵa jáne paıdaly qazbalary bar jańa perspektıvaly aýmaqtardy ashýǵa múmkindik beredi», - dedi mınıstr.