Tájikstandyq kompanııa Astanaǵa 1200 tonna arzan pııaz jetkizbek

ASTANA. QazAqparat – «Astana» áleýmettik-kásipkerlik korporatsııasy men «Tájikagroprom» kompanııasy arasynda 1 200 tonna pııaz jetkizý týraly kelisimshartqa qol qoıyldy. Bul týraly eldordanyń ınvestıtsııalar jáne kásipkerlikti damytý basqarmasy basshysynyń orynbasary Maqsat Jańabaev aıtty, dep habarlaıdy QazAqparat tilshisi.

«Óndiristi jaqsartý jáne qalany qantpen qamtamasyz etý úshin forvardtyq mehanızm arqyly Merki qant zaýytymen 2023 jylǵa 3,5 myń tonna kóleminde nesıelik kelisimshart jasaldy. Sonymen qatar, jańa tásildiń biri – ımporttalǵan kókónisterdi satyp alý qarastyrylǵan», - dedi ol qalalyq kommýnıkatsııalar qyzmetinde ótken brıfıngide.

Qalada pııaz tapshylyǵy bolmaý úshin tájikstandyq kompanııamen kelisim jasalǵan.

«Mysaly, Tájikstan Respýblıkasyna jasalǵan issapar qorytyndysy boıynsha, «Astana» áleýmettik-kásipkerlik korporatsııasy men «Tájikagroprom» kompanııasy arasynda 1 200 tonna pııaz jetkizý týraly kelisimshartqa qol qoıyldy. Alǵashqy jetkizilim mamyr aıynda – 500 tonna, maýsym aıynda 500 tonna jáne shilde aıynda 200 tonna kókónis jetkiziledi», - dedi Maqsat Jańabaev.