Tájikstan qazaqstandyq avtobýstardy satyp alady

ASTANA. QazAqparat - Dýshanbe qalasynda «KazakhExport» eksporttyq saqtandyrý kompanııasy» AQ men «Holdıng Azııa Grýpp Tadjıkıstan» JAQ Tájikstanǵa avtobýstar jetkizý týraly memorandýmǵa qol qoıdy. Bul týraly QazAqparat kompanııanyń baspasóz qyzmetine silteme jasap habarlaıdy.

QR Premer-Mınıstriniń birinshi orynbasary Asqar Mamınniń Tájikstan Respýblıkasyna sapary aıasynda jasalǵan mámile Almaty oblysyndaǵy «Hyundai Trans Auto» JShS óndiris alańynda shyǵarylǵan 300 dana sandaǵy Hyundai County markaly avtobýstaryn jalpy 19 mln AQSh dollarynan astam somaǵa jetkizýdi kózdeıdi.

Avtobýstar Dýshanbe qalasynyń avtobýs avtoparkin keńeıtýge arnalǵan jáne Tájikstannyń qalalyq jáne qala mańyndaǵy baǵyttarynda paıdalanylatyn bolady.

«KazakhExport» «Hyundai Trans Auto» JShS-ne bastapqy kezeńde mámileni durys qurylymdaýǵa jáne eksporttyq qoldaý quraldaryn qoldana otyryp bul mámileni iske asyrýǵa qolǵabys kórsetedi», - dep túsindirdi «KazakhExport» basqarma tóraǵasy Rýslan Iskakov.

«KazakhExport»-tyń qoldaý quraldary Qazaqstannan Tájikstan Respýblıkasyna taýarlar eksporty kóleminiń ósýine septigin tıgizedi.

2017 jylǵy kóktemde «Holdıng Azııa Grýpp Tadjıkıstan» JAQ-y «KazakhExport» ESK» AQ-nyń qoldaýymen «Allıýr» KT» AQ-men (onyń quramyna «Saryarqa AvtoProm» jáne «Agromash Holdıng» óndiristik alańdary kiredi) jalpy quny $10,5 mln. bolatyn 1000 dana JAC avtomobılderin jetkizý jónindegi kelisimshartqa qol qoıdy. Tájik jaǵynyń ókilderi qazaqstandyq avtomobılderdiń joǵary ótkishtigin jáne baǵasynyń qoljetimdiligin atap ótti.