Tájikstan elshisi Maqtaaraldaǵy etno-mádenı ortalyqqa mýzykalyq aspaptar syılady

MAQTAARAL. QazAqparat – Tájikstannyń Qazaqstandaǵy tótenshe jáne ókiletti elshisi Ibodzoda Haırýlla Maqtaaral aýdanyna jumys saparymen kelip, aýdan ákimi Baqyt Asanovpen kezdesti. Aýdan basshysy Maqtaaral aýdanynyń áleýmettik-ekonomıkalyq jaǵdaıy týraly elshige tanystyryp, aýdanda basqa dıasporalardyń mádenıetin damytý úshin atqarylyp jatqan jumystar jóninde keńinen baıandady, dep habarlaıdy QazAqparat tilshisi.

Sonymen qatar, ákim ótken jyly Maqtaaral aýdanynda oryn alǵan tótenshe jaǵdaıda tájikter qonystanǵan Ferdaýsı aýylyn da sý alǵanyn jáne apattyń saldaryn joıýda bárine teńdeı kómek kórsetilgenin jetkizdi.

«Maqtaaral aýdanynda 133 myńnan asa turǵyn bar. Tájik, ózbek, orys, káris, ázerbaıjan jáne ózge de ult ókilderi turatyn kópultty aýdanbyz. Barlyq ulttar bir-birimen tatý-tátti ǵumyr keshýde. Ol úshin 5 ulttyń etno-mádenı ortalyqtary belsendi jumys júrgizýde», - dedi Baqyt Asanov.

Óz kezeginde elshi Maqtaaral aýdany Tájikstanmen agrosektor salasynda yntymaqtastyqta jumys júrgize alatynyn jáne tájirıbe almasyp, aýyl sharýashylyǵy salasyndaǵy jańa tehnologııalarmen bólisip turýǵa bolatynyn atap ótti. Taraptar týrızm, kásipkerlik, mádenıet salasynda baılanysty arttyryp, jumystardy jandandyrý jóninde ortaq kelisimge keldi. Elshi tájik úlgisindegi sháıhanalar men meıramhanalardy aýdan ortalyǵy Myrzakent kentinen ashý úshin arnaıy jobalardy usyndy.

Jıyn sońynda Ibodzoda Haırýlla Maqtaaral aýdanyndaǵy tájik etno-mádenı ortalyǵyna birneshe ulttyq mýzykalyq aspap pen ulttyq kıimderdi syıǵa tartty.